ഷിംജിതയുടെ ജാമ്യഅപേക്ഷ തള്ളി കോടതി
കോഴിക്കോട്: സ്വകാര്യ ബസിൽ യാത്ര ചെയ്യുന്നതിനിടെ ലൈംഗികാതിക്രമം നടത്തിയെന്ന ആരോപണവുമായി ബന്ധപ്പെട്ട് സമൂഹമാധ്യമങ്ങളിൽ വീഡിയോ പ്രചരിപ്പിച്ചതിന് പിന്നാലെ യുവാവ് ജീവനൊടുക്കിയ കേസിൽ പ്രതിയായ ഷിംജിതയ്ക്ക് ജാമ്യം നിഷേധിച്ചു.
കുന്ദമംഗലം ഒന്നാം ക്ലാസ് മജിസ്ട്രേറ്റ് കോടതിയാണ് ഷിംജിത സമർപ്പിച്ച ജാമ്യാപേക്ഷ തള്ളിയത്. ഇതോടെ ആത്മഹത്യയ്ക്ക് പ്രേരിപ്പിച്ചതെന്ന ഗുരുതര കുറ്റം ചുമത്തപ്പെട്ട ഷിംജിത റിമാൻഡിൽ തുടരും.
ജാമ്യം അനുവദിച്ചാൽ കേസന്വേഷണത്തെ ബാധിക്കുന്ന തരത്തിൽ പ്രതി സാക്ഷികളെ സ്വാധീനിക്കാനുള്ള സാധ്യതയുണ്ടെന്ന് പൊലീസ് കോടതിയിൽ സമർപ്പിച്ച റിപ്പോർട്ടിൽ വ്യക്തമാക്കി.
കേസന്വേഷണം ഇപ്പോഴും പ്രാരംഭ ഘട്ടത്തിലാണെന്നും, ഈ ഘട്ടത്തിൽ ജാമ്യം ലഭിച്ചാൽ സാക്ഷികളെയും പരാതിക്കാരുമായി ബന്ധപ്പെട്ട വ്യക്തികളെയും സ്വാധീനിക്കാൻ സാധ്യതയുണ്ടെന്നുമാണ് മെഡിക്കൽ കോളേജ് പൊലീസ് കുന്ദമംഗലം ഒന്നാം ക്ലാസ് മജിസ്ട്രേറ്റ് കോടതിയെ അറിയിച്ചത്.
പ്രോസിക്യൂഷൻ കോടതിയിൽ വാദിച്ചത്, സമൂഹവിചാരണ നടത്തണമെന്ന ദുരുദ്ദേശത്തോടെയാണ് ഷിംജിത വീഡിയോ ചിത്രീകരിക്കുകയും അത് സമൂഹമാധ്യമങ്ങളിൽ പ്രചരിപ്പിക്കുകയും ചെയ്തതെന്നാണ്.
ബസിനുള്ളിൽ നടന്ന സംഭവത്തിന്റെ വീഡിയോ എടുത്ത് ഇൻസ്റ്റഗ്രാമിൽ പോസ്റ്റ് ചെയ്തതോടെ അത് വ്യാപകമായി പ്രചരിച്ചു.
ഇതിനെത്തുടർന്ന് കടുത്ത മാനസിക സമ്മർദ്ദത്തിലായാണ് കോഴിക്കോട് ഗോവിന്ദപുരം സ്വദേശിയായ യു. ദീപക് ജീവനൊടുക്കിയതെന്നും പ്രോസിക്യൂഷൻ ചൂണ്ടിക്കാട്ടി.
വീഡിയോ പ്രചരിപ്പിച്ചതിന് പിന്നാലെ ദീപക് അപമാനവും മാനസിക വേദനയും അനുഭവിച്ചിരുന്നുവെന്നതും കോടതിയിൽ വിശദീകരിച്ചു.
അതേസമയം, പ്രതിഭാഗം ശക്തമായ എതിർവാദങ്ങളാണ് ഉന്നയിച്ചത്. ദീപക്കിനെ ഷിംജിതയ്ക്ക് മുൻപരിചയമില്ലെന്നും, വീഡിയോ ചിത്രീകരിക്കുകയും അത് സമൂഹമാധ്യമങ്ങളിൽ പങ്കുവയ്ക്കുകയും ചെയ്തതുമാത്രം ആത്മഹത്യയ്ക്ക് പ്രേരിപ്പിച്ചതായി കണക്കാക്കാനാകില്ലെന്നുമാണ് പ്രതിഭാഗം കോടതിയിൽ വാദിച്ചത്.
ആത്മഹത്യാ പ്രേരണക്കുറ്റം നിലനിൽക്കാൻ ആവശ്യമായ നിയമപരമായ ഘടകങ്ങൾ ഈ കേസിൽ ഇല്ലെന്ന നിലപാടാണ് പ്രതിഭാഗം സ്വീകരിച്ചത്.
ജനുവരി 16നാണ് കേസിനാസ്പദമായ സംഭവം നടന്നത്. സ്വകാര്യ ബസിൽ യാത്ര ചെയ്യുന്നതിനിടെ ദീപക് ലൈംഗികാതിക്രമം നടത്തിയെന്നാരോപിച്ച് ഷിംജിത വീഡിയോ ചിത്രീകരിച്ചു.
തുടർന്ന് ഈ വീഡിയോ ഇൻസ്റ്റഗ്രാമിൽ പോസ്റ്റ് ചെയ്യുകയായിരുന്നു. വീഡിയോ വളരെ വേഗത്തിൽ സമൂഹമാധ്യമങ്ങളിൽ വ്യാപകമായി പ്രചരിച്ചു.
ഇതിന് പിന്നാലെ, തൊട്ടടുത്ത ദിവസം ദീപക് ജീവനൊടുക്കി. സംഭവം സംസ്ഥാനത്താകെ വലിയ സാമൂഹിക ചർച്ചകൾക്ക് വഴിവച്ചിരിക്കുകയാണ്.
