കോഴിക്കോട്: കെഎസ്ആര്ടിസി ബസിൽ കൊറിയര്, പാഴ്സല് സര്വീസ് ചാര്ജ് വർധിപ്പിച്ചു. ഇന്ന് മുതല് പുതുക്കിയ ചാര്ജ് ഈടാക്കുമെന്ന് കെഎസ്ആര്ടിസി ഉത്തരവില് അറിയിച്ചു. പാഴ്സലിന്റെ ഭാരത്തിന്റെ അനുപാതംകൂട്ടിയാണ് ചാര്ജ് വർധിപ്പിച്ചിരിക്കുന്നത്.(Courier and parcel service charges have been increased in KSRTC)
പുതുക്കിയ നിരക്ക് ഇങ്ങനെ
ഒന്നു മുതല് അഞ്ചു വരെ കിലോ (200 കിലോമീറ്ററിന്) 110 രൂപ. 5-15 കിലോ 132 രൂപ, 15-30 കിലോ 158 രൂപ, 30-45 കിലോ 258 രൂപ, 45-60 കിലോ 309 രൂപ, 60 -75 കിലോ 390 രൂപ, 75 -90 കിലോ 468 രൂപ, 90-105 കിലോ 516 രൂപ എന്നിങ്ങനെയാണ് പുതുക്കിയ ചാര്ജ്. കിലോമീറ്റര് ദൂരം കൂടുന്നതിന് അനുസരിച്ച് ചാര്ജ് ആനുപാതികമായി വർധിക്കുന്നതാണ്.
നേരത്തേ 30 കിലോ വ്യത്യാസത്തിലായിരുന്നു സ്കെയില് നിശ്ചയിച്ചിരുന്നത്. ഒന്നു മുതല് 30 വരെ കിലോ അയക്കുന്നതിന് 110 രൂപയായിരുന്നു ഇടാക്കിയിരുന്നത്. എന്നാൽ ഇപ്പോള് 1 മുതല് 2 കിലോ, 5 മുതല് 15, 15 മുതല് 30 എന്നിങ്ങനെ മൂന്ന് സ്കെയിലാക്കി തിരിച്ചു.
90 കിലോക്ക് മുകളിലുള്ള സാധനം 200 കിലോമീറ്റര് ദൂരപരിധിയില് അയക്കാന് നേരത്തേ 430 രൂപയായിരുന്നു. എന്നാൽ പുതുക്കിനിശ്ചയിച്ച നിരക്ക് പ്രകാരം 516 രൂപ നൽകണം. കുറഞ്ഞ ചാര്ജ് ഈടാക്കിയിരുന്ന കൊറിയര് സര്വീസ് വഴി കെഎസ്ആര്ടിസിക്ക് മികച്ച വരുമാനം ലഭിച്ചിരുന്നു.
