ചിത്തിര തിരുനാളിന്റെ ചിത്രം ബിജെപി തിരിച്ചെത്തിച്ചു; തിരുവനന്തപുരം കോർപറേഷനിൽ എൽഡിഎഫ് – ബിജെപി തർക്കം
തിരുവനന്തപുരം: സിപിഎം നേതാവ് ആര്യാ രാജേന്ദ്രൻ മേയറായിരുന്ന എൽഡിഎഫ് ഭരണസമിതി കോർപറേഷൻ കൗൺസിൽ ഹാളിൽ നിന്ന് നീക്കം ചെയ്തിരുന്ന ചിത്തിര തിരുനാൾ ബാലരാമവർമയുടെ ചിത്രം ബിജെപി തിരിച്ചെത്തിച്ചു.
ചിത്രം പുനഃസ്ഥാപിച്ചതോടെ തിരുവനന്തപുരം കോർപറേഷനിൽ എൽഡിഎഫും ബിജെപിയും തമ്മിൽ കടുത്ത രാഷ്ട്രീയ തർക്കം പൊട്ടിപ്പുറപ്പെട്ടു.
നാലു പതിറ്റാണ്ടുകൾക്ക് ശേഷം സിപിഎമ്മിൽ നിന്ന് കോർപറേഷൻ ഭരണം ബിജെപി പിടിച്ചെടുത്തതിനു പിന്നാലെ തുടർച്ചയായി വിവാദങ്ങളാണ് ഉയരുന്നത്.
വി.കെ. പ്രശാന്ത് എംഎൽഎയും ബിജെപി കൗൺസിലർ ആർ. ശ്രീലേഖയും തമ്മിലുണ്ടായ തർക്കവും, കോർപറേഷനും കെഎസ്ആർടിസിയും തമ്മിലുള്ള ഇലക്ട്രിക് ബസ് വിവാദവും തുടർന്നാണ് ഇപ്പോൾ ചിത്രം സംബന്ധിച്ച വിവാദം ഉടലെടുത്തിരിക്കുന്നത്.
1940-ൽ തിരുവനന്തപുരം കോർപറേഷൻ രൂപീകരിച്ചതു മുതൽ മേയറുടെ ഡയസിന് പിന്നിൽ സ്ഥാപിച്ചിരുന്ന ചിത്തിര തിരുനാൾ ബാലരാമവർമയുടെ ചിത്രം, മുൻ എൽഡിഎഫ് ഭരണസമിതിയുടെ കാലാവധിയുടെ അവസാന നാളുകളിൽ നീക്കം ചെയ്തിരുന്നു.
2020–2025 കാലയളവിലെ അവസാന കൗൺസിൽ യോഗത്തിന് തൊട്ടുമുമ്പാണ് ചിത്രം മാറ്റിയത്. അതിനു പകരം മഹാത്മാ ഗാന്ധിയുടെ ചിത്രം സ്ഥാപിക്കുകയും ചെയ്തു.
അന്ന് ബിജെപി ശക്തമായ പ്രതിഷേധം ഉയർത്തിയെങ്കിലും, ചിത്രം പഴയ സ്ഥാനത്ത് തിരിച്ചുവയ്ക്കാൻ എൽഡിഎഫ് ഭരണസമിതി തയ്യാറായിരുന്നില്ല.
എന്നാൽ, ബിജെപിയുടെ നേതൃത്വത്തിൽ പുതിയ ഭരണസമിതി അധികാരമേറ്റതിനു പിന്നാലെ ഗാന്ധിജിയുടെയും ചിത്തിര തിരുനാളിന്റെയും ചിത്രങ്ങൾ അടുത്തടുത്തായി കൗൺസിൽ ഹാളിൽ സ്ഥാപിക്കുകയായിരുന്നു.
ചിത്രം മാറ്റണമെന്ന ആവശ്യവുമായി എൽഡിഎഫ് രംഗത്തെത്തിയെങ്കിലും, ഇത് അംഗീകരിക്കാനാവില്ലെന്ന് ഭരണസമിതി നിലപാട് വ്യക്തമാക്കിയതോടെ കോർപറേഷനിലെ അന്തരീക്ഷം കലുഷിതമായി.
ചിത്രം മുമ്പ് അവിടെ ഉണ്ടായിരുന്നതാണെന്നും, ഇടക്കാലത്ത് നീക്കം ചെയ്ത ചിത്രം തിരിച്ചുവയ്ക്കുക മാത്രമാണ് ചെയ്തതെന്നും മേയർ വി.വി. രാജേഷ് പ്രതികരിച്ചു.
English Summary
A political controversy has erupted in the Thiruvananthapuram Corporation after the BJP-led administration reinstated the portrait of Chithira Thirunal Balarama Varma in the council hall, which had been removed during the final days of the previous LDF-led council under former mayor Arya Rajendran.
chithira-thirunal-photo-row-thiruvananthapuram-corporation
Thiruvananthapuram Corporation, BJP, LDF, Chithira Thirunal, Arya Rajendran, Kerala Politics, Photo Controversy
