തിരുവനന്തപുരം: ഉപജില്ലാ സ്കൂള്‍ കായിക മേളക്കിടെ ഓട്ട മത്സരത്തിൽ പങ്കെടുത്ത വിദ്യാർത്ഥികളുടെ കാലിലെ തൊലി അടര്‍ന്നുമാറി. കിളിമാനൂര്‍ ഉപജില്ല കായികമേളക്കിടെയാണ് സംഭവം. സിന്തറ്റിക് ട്രാക്കിൽ സ്പൈക്ക് ഷൂവില്ലാതെ ഓട്ട മത്സരത്തിനിറങ്ങിയ വിദ്യാര്‍ത്ഥികൾക്കാണ് പരിക്കേറ്റത്.(Children who ran on a synthetic track without spikes had peeling skin on their feet)

മൂന്ന് വിദ്യാർത്ഥികളുടെ കാലിലെ തൊലിയാണ് അടര്‍ന്നുമാറിയത്. ഇതേ തുടര്‍ന്ന് മൂന്നുപേരെയും ആശുപത്രിയിൽ പ്രവേശിപ്പിച്ചു. ചൂടായി കിടന്ന സിന്തറ്റിക് ട്രാക്കിൽ ഓടാനുപയോഗിക്കുന്ന സ്പൈക്ക് ഷൂവില്ലാതെ മത്സരത്തിനിറങ്ങിയപ്പോൾ കാല്പാദം പൊള്ളി തൊലി അടര്‍ന്ന് നീങ്ങുകയായിരുന്നു. കിളിമാനൂര്‍ ശ്രീപാദം സ്പോര്‍ട്സ് ഹബ്ബിലാണ് ഉപജില്ലാ കായിക മേളയുടെ ഓട്ട മത്സരങ്ങൾ നടക്കുന്നത്.