ഡബ്ലിൻ : വ്യാഴാഴ്ച്ച ഉച്ചയോടെ കുടിയേറ്റക്കാരനായ അക്രമി നടത്തിയ കത്തി ആക്രമണത്തിൽ പരിക്കേറ്റ അഞ്ച് വയസുകാരിയുടെ നില അതീവ ഗുരുതരമായി തുടരുന്നു. ഒപ്പം പരിക്കേറ്റ 30 വയസുകാരിയുടെ ആരോഗ്യ സ്ഥിതി മെച്ചപ്പെട്ടിട്ടില്ല എന്നും അയർലൻഡ് ആരോഗ്യവകുപ്പ് അറിയിച്ചു. അതേ സമയം ആക്രമണത്തെ തുടർന്ന് ഡബ്ലിൻ നഗരത്തിൽ കുടിയേറ്റക്കാർക്കെതിരെ ആരംഭിച്ച കലാപം നിയന്ത്രണവിധേയമാക്കിയെന്ന് പോലീസ് മേധാവി അറിയിച്ചു. രണ്ടാം ദിവസമായ വെള്ളിയാഴ്ച്ച രാത്രിയും ഒറ്റപ്പെട്ട അക്രമസംഭവങ്ങൾ ഉണ്ടായി. വ്യാഴ്യാഴ്ച്ച ഉണ്ടായ ആക്രമണത്തിൽ പങ്ക് ഉണ്ടെന്ന് കരുതുന്ന 34 പേരെ അറസ്റ്റ് ചെയ്തിട്ടുണ്ട്. കൂടുതൽ അറസ്റ്റ് ഉണ്ടാകുമെന്ന് പോലീസ് മേധാവി അയർലഡ് മാധ്യമങ്ങളെ അറിയിച്ചു.
പ്രദേശത്തെ മുഴുവൻ സിസിടിവി ദൃശ്യങ്ങളും പോലീസ് പരിശോധിക്കുന്നു. പ്രദേശത്തെ പോലീസ് സാനിധ്യം കുറച്ചിട്ടില്ല. കർശന പരിശോധന തുടരുകയാണ്. കലാപത്തെ തുടർന്ന് കോടികണക്കിന് രൂപയുടെ നാശനഷ്ട്ടം ഉണ്ടായിട്ടുണ്ടെന്നാണ് പ്രാഥമിക നിഗമനം. നിരവധി ബസുകളും കാറുകളും അക്രമികൾ കത്തിച്ച് നശിപ്പിച്ചു. അനവധി കടകളും കൊള്ളയടിക്കപ്പെട്ടിട്ടുണ്ട്. നഗരത്തിലുണ്ടായിരുന്ന കെട്ടിടങ്ങൾക്കും കേട്പാടുകൾ സംഭവിച്ചു. കലാപം ആവർത്തിക്കാതിരിക്കാൻ കർശന നിയമനിർമാണം നടത്തുമെന്ന് നീതിന്യായ വകുപ്പ് മന്ത്രി ഹെലൻ മക്‌എന്റി പറഞ്ഞു. എല്ലാ രാഷ്ട്രിയ പാർട്ടികളും കലാപത്തെ തള്ളി പറഞ്ഞു. അയർലഡിനെ നാണം കെടുത്തിയ സംഭവത്തിന്റെ ഉത്തരവാദിത്വം ഏറ്റെടുത്ത് നീതിന്യായവകുപ്പ് മന്ത്രി ഹെലൻ മക്‌എന്റി രാജി വയ്ക്കണമെന്ന് പ്രതിപക്ഷ പാർട്ടികളും ആവിശ്യപ്പെട്ടു.ആക്രമണം നിയന്ത്രണവിധേയമായതോടെ ഡബ്ലിനിലെ ഗതാഗത സേവനങ്ങൾ സാവധാനം സാധാരണ നിലയിലേക്ക് മടങ്ങുന്നു. മുഴുവൻ സർവീസുകളും ഉടൻ പുനരാരംഭിക്കുമെന്ന് സർക്കാർ വ്യക്തമാക്കി. സിറ്റി സെന്റർ സർവീസുകൾക്കാണ് ഇപ്പോൾ നിയന്ത്രണം ഉള്ളത്.
അതേ സമയം സാമൂഹിക മാധ്യമങ്ങൾ വഴി അയർലഡിലെ കുടിയേറ്റക്കാർക്കെതിരെ വിദ്വേഷപ്രചാരണം വ്യാപകമാണ്. അയർലഡിൽ ജനിക്കുന്ന വിദേശമാതാപിതാക്കളുടെ കുട്ടികളുടെ എണ്ണം വർദ്ധിച്ചുവെന്ന് അക്രമികളുടെ ഒരു പ്രചാരണം. രാജ്യത്തെ ആകെ ജനസഖ്യയുടെ 20 ശതമാനം കുടിയേറ്റക്കാരായ മാതാപിതാക്കളിൽ ജനിക്കുന്ന കുട്ടികളാണത്രേ. ഇംഗ്ലണ്ടിൽ 15 ശതമാനവും അമേരിക്കയിൽ 14 ശതമാനവും മാത്രമെന്ന കണക്കും പ്രചരിക്കുന്നുണ്ട്. മതവിദ്വേഷ പ്രചാരണങ്ങളും സജീവം. ഇതിനെതിരെ നടപടി എടുക്കുമെന്ന് അയർലഡ് പ്രധാനമന്ത്രി ലിയോ വരദ്ക്കർ അറിയിച്ചു. അക്രമങ്ങളെ തള്ളി പറഞ്ഞ പ്രധാനമന്ത്രി രാജ്യത്തിന്റെ മുന്നോട്ടുള്ള പോക്കിനെ ഒരു തരത്തിലും അക്രമം ബാധിക്കില്ലെന്നും വ്യക്തമാക്കി.
