തിരുവനന്തപുരം: വ്യാജമദ്യം തടയാൻ പുതിയ സംവിധാനവുമായി ബെവ്കോ. ഇതിന്റെ ഭാഗമായി ബെവ്കോ വഴി വിൽക്കുന്ന മദ്യകുപ്പികളിൽ ഹോളോ ഗ്രാം പതിക്കും.
ഇതിലൂടെ വ്യാജമദ്യത്തെ തിരിച്ചറിയാനും അനധികൃത മദ്യവിൽപ്പന തടയാനുമാകും എന്നാണ് ബെവ്കോ അധികൃതർ വ്യക്തമാക്കുന്നത്. ഏപ്രിൽ ഒന്നുമുതൽ പുതിയ സംവിധാനം നിലവിൽ വരും.
കണക്കുകൾ കൃത്യമായി സൂക്ഷിക്കാനും ഇതിലൂടെ കഴിയുമെന്ന് ബെവ്കോ അധികൃതർ വ്യക്തമാക്കി. മദ്യ വിതരണ കമ്പനികൾ തന്നെയാകും ഹോളോ ഗ്രാം പതിക്കുക.
ഇതിന് ശേഷമാകും വെയർ ഹൗസിലെത്തിക്കുക. നിലവിൽ മദ്യ കുപ്പികൾ വെയർ ഹൗസിലെത്തിച്ച ശേഷമാണ് കുപ്പിയുടെ അടപ്പിന് മുകളിൽ സ്റ്റിക്കർ ഒട്ടിക്കുന്നത്. വ്യാജനെ തടയാനും അനധികൃത വിൽപ്പന തടയുന്നതിനുമൊക്കയാണ് ബെവ്ക്കോയുടെ മുദ്രപതിക്കുന്നത്.
ഇപ്പോൾ ഒട്ടിക്കുന്ന ഹോളോഗ്രാം മാതൃകയിലുള്ള സ്റ്റിക്കർ കൊണ്ട് കാര്യമായ ഉപയോഗമില്ല. വ്യാജൻമാരും ഇതേ രീതിയിൽ ഹോളോ ഗ്രാം ഉണ്ടാക്കുന്നുണ്ട്.
പുതിയ ഹോളോ ഗ്രാം മുദ്ര സ്കാൻ ചെയ്താൽ മദ്യ വിതരണക്കാരുടെ വിവരം, വെയർഹൗസിന്റെ വിശദാംശങ്ങൾ എന്നിവ ഉൾപ്പെടെ അറിയാം. അനധകൃതമായി ബെവ്കോയിൽ നിന്നുള്ള വിൽപ്പന പിടികൂടിയാൽ സ്കാൻ ചെയ്തൽ മുഴുവൻ വിവരങ്ങളും ലഭിക്കും.
മാത്രമല്ല ഹോളോ ഗ്രാം പൊട്ടിച്ചാൽ അടപ്പും തുറക്കും. പൊട്ടിച്ച് ഉപയോഗിച്ച് വീണ്ടും ഹോളോഗ്രാം ഒപ്പിച്ചുവയ്ക്കാനും കഴിയില്ല. മദ്യവിതരണത്തിന്റെ കൃത്യമായ കണക്കുകൾ സൂക്ഷിക്കാൻ പുതിയ ഹോളോ ഗ്രാം വഴി കഴിയുമെന്ന് ബെവ്ക്കോ എംഡി പറ‌ഞ്ഞു.
വെയർഹൗസുകളിലും ഔട്ട് ലെറ്റുകളിലും പൊട്ടിപോകുന്ന മദ്യകുപ്പികളുടെ എണ്ണം ഉൾപ്പെടെ തിട്ടപ്പെടുത്താൻ പുതിയ സംവിദാനത്തിലൂടെ കഴിയും. സി-ഡിറ്റ് പ്രിൻറ് ചെയ്യുന്ന നിലവിലെ ഹോളോ ഗ്രാം സിറ്റിക്കറുകൾ 300 തൊഴിലാളികളെ കൊണ്ടാണ് ഒട്ടിക്കുന്നത്.
പുതിയ സംവിധാനത്തിൽ തൊഴിലാളികളുടെ ആവശ്യമില്ല. മദ്യകമ്പനികൾ ഫാക്ടറികളിൽ സ്ഥാപിക്കുന്ന മെഷീൻ ഉപയോഗിച്ചാണ് ഹോളോ ഗ്രാം കുപ്പികളിൽ പതിപ്പിക്കുന്നത്.
ഈ മെഷീൻ സ്ഥാപിക്കമെങ്കിൽ മദ്യ വില വർദ്ധിപ്പിക്കണമെന്നായിരുന്ന മദ്യ വിതരണ കമ്പനികളുടെ ആവശ്യം. ഹോളോ ഗ്രാം പതിക്കുന്നത് മെഷീനിലേക്ക് മാറുമ്പോൾ ഈ ജോലി ചെയ്തിരുന്ന തൊഴിലാളികളെ ഔട്ട് ലെറ്റുകളിലേക്ക് പുനർവിന്യസിപ്പിക്കും.
അതേസമയം, സംസ്ഥാനത്ത് മദ്യവില വർധനവ് ഇന്നലെ നിലവിൽ വന്നിരുന്നു. പത്തു രൂപ മുതൽ 50 രൂപയുടെ വരെ വർധനവാണ് മദ്യത്തിനുണ്ടായത്. ഇന്ത്യൻ നിർമിത വിദേശമദ്യത്തിന് പുറമേ ബീയറിനും വൈനിനും വില കൂടിയിട്ടുണ്ട്.
ബെവ്കോയുടെ നിയന്ത്രണത്തിൽ ഉൽപാദിപ്പിച്ചു വിൽക്കുന്ന ജവാൻ റമ്മിന്റെ വിലയിലും വർധനവുണ്ട്. ശരാശരി 10ശതമാനം വിലവർധന ഒരു കുപ്പിയിലുണ്ടാകും.
