ഓസ്ട്രേലിയൻ ‘സി.ഇ.ഒ’ പൂട്ടിയ വീട്ടിൽ; സക്കിയുള്ള ഇസഡ് പാർക്കറെ പിടികൂടി തടിയിട്ടപ്പറമ്പ് പോലീസ്
കൊച്ചി:
ഓസ്ട്രേലിയയിൽ ജോലി വാഗ്ദാനം ചെയ്ത് ലക്ഷങ്ങൾ തട്ടിയെടുത്ത കേസിൽ ഓസ്ട്രേലിയൻ പൗരനായ സക്കിയുള്ള ഇസഡ് പാർക്കർ (58) അറസ്റ്റിൽ. തടിയിട്ടപ്പറമ്പ് പോലീസാണ് പ്രതിയെ ഇൻഡോറിൽ നിന്ന് പ്രത്യേക ഓപ്പറേഷനിലൂടെ പിടികൂടിയത്.
യു.എ.ഇയിൽ ജോലി ചെയ്തിരുന്ന യുവതിയെയാണ് പ്രതി കബളിപ്പിച്ചത്.
പുക്കാട്ടുപടിയിൽ വാടകയ്ക്ക് താമസിച്ചിരുന്ന യുവതിയുമായി സാമൂഹിക മാധ്യമങ്ങളിലൂടെ പരിചയപ്പെട്ട പ്രതി, താൻ ഓസ്ട്രേലിയയിലെ പ്രശസ്ത കമ്പനിയുടെ സി.ഇ.ഒ ആണെന്നും അതേ സ്ഥാപനത്തിൽ ജോലി നൽകാമെന്നുമായിരുന്നു വാഗ്ദാനം.
ജോലി ഉറപ്പാക്കുന്നതിനായി അഞ്ച് ലക്ഷത്തി എൺപതിനായിരം രൂപ യുവതിയിൽ നിന്ന് പ്രതി കൈപ്പറ്റി. എന്നാൽ ഏറെ നാളുകൾ കഴിഞ്ഞിട്ടും ജോലി ലഭിക്കാതിരുന്നതോടെ നടത്തിയ അന്വേഷണത്തിലാണ് തട്ടിപ്പാണെന്ന് യുവതി തിരിച്ചറിഞ്ഞത്.
തുടർന്ന് യുവതി തടിയിട്ടപ്പറമ്പ് പോലീസിൽ പരാതി നൽകുകയായിരുന്നു.
പോലീസ് നടത്തിയ ശാസ്ത്രീയ അന്വേഷണത്തിൽ പ്രതി ഇന്ത്യയിൽ തന്നെ വിവിധ സ്ഥലങ്ങളിൽ താമസം മാറ്റിക്കൊണ്ടിരിക്കുകയാണെന്ന് കണ്ടെത്തി.
ഒടുവിൽ ഇൻഡോറിലെ ഒരു ആഡംബര ഫ്ലാറ്റിലാണ് ഇയാൾ താമസിക്കുന്നതെന്ന് വിവരം ലഭിച്ചു. പുറത്തുനിന്ന് നോക്കുമ്പോൾ ഫ്ലാറ്റ് പൂട്ടിയ നിലയിലായിരുന്നെങ്കിലും, പ്രത്യേക ഓപ്പറേഷൻ നടത്തി അകത്ത് പ്രവേശിച്ചാണ് പ്രതിയെ പിടികൂടിയത്.
അറസ്റ്റിനിടെ പ്രതിയിൽ നിന്ന് ലാപ്ടോപ്പുകൾ, മൊബൈൽ ഫോണുകൾ, നിരവധി രേഖകൾ എന്നിവ പോലീസ് പിടിച്ചെടുത്തു.
‘ശുഭം ശർമ’ എന്ന പേരിൽ വ്യാജ ആധാർ കാർഡ് തയ്യാറാക്കി പുതിയ തട്ടിപ്പിനായി തയ്യാറെടുക്കുന്നതിനിടെയാണ് ഇയാൾ പിടിയിലായത്.
കേസിലെ അന്വേഷണം എ.എസ്.പി ഹാർദിക് മീണയുടെ നേതൃത്വത്തിലാണ് നടന്നത്. ഇൻസ്പെക്ടർ കെ. എൻ. മനോജ്, എസ്.ഐ എൻ. കെ. ജേക്കബ്, സീനിയർ സി.പി.ഒ കെ. കെ. ഷിബു, സി.പി.ഒ മിഥുൻ മോഹൻ എന്നിവർ അന്വേഷണ സംഘത്തിലുണ്ടായിരുന്നു.
English Summary :
An Australian national, Zakiyulla Ized Parker (58), was arrested by Thadiyittaparamba police for cheating a woman by offering a fake job in Australia and collecting ₹5.8 lakh.
australian-national-job-scam-arrested-thadiyittaparamba-police-indore
job fraud, australia job scam, online cheating, social media fraud, thadiyittaparamba police, indore arrest, cyber crime, fake job offer, kerala news, financial fraud
