പഠനത്തിന് പ്രായമല്ല മനസ്സാണ് പ്രധാനം എന്ന് തെളിയിക്കുകയാണ് നടൻ ഇന്ദ്രൻസ്. 68 വയസ്സിൽ സാക്ഷരതാ മിഷന് നടത്തുന്ന ഏഴാം ക്ലാസ് തുല്യതാ പരീക്ഷ എഴുതിയിരിക്കുകയാണ് അദ്ദേഹം. തിരുവനന്തപുരം അട്ടക്കുളങ്ങരയിലെ സെന്ട്രല് സ്കൂളില് വച്ചാണ് നടൻ പരീക്ഷ എഴുതുന്നത്.(At the age of 68, actor Indrans wrote the 7th class exam)
ഏഴാംക്ലാസ് ജയിച്ചാലേ പത്തിൽ പഠിക്കാനാവൂ എന്ന സാക്ഷരതാമിഷന്റെ ചട്ടപ്രകാരം ആണ് താരം ഇപ്പോൾ പരീക്ഷ എഴുതുന്നത്. പത്താംക്ലാസ് തുല്യത നേടുക എന്നതാണ് ഇന്ദ്രൻസിന്റെ ലക്ഷ്യം.
നടന് അഭിനന്ദനങ്ങൾ അറിയിച്ച് മന്ത്രി ശിവൻകുട്ടി രംഗത്ത് എത്തിയിട്ടുണ്ട്. തന്റെ അറുപത്തി എട്ടാം വയസിലാണ് ഇന്ദ്രൻസ് ഏഴാം ക്ലാസ് പരീക്ഷ എഴുതുന്നത്.
നവകേരളസദസ്സിന്റെ ചടങ്ങിൽ പങ്കെടുക്കവേയാണ് തുടർപഠനത്തിന് ഇന്ദ്രൻസ് താത്പര്യം അറിയിച്ചത്. നാലാംക്ലാസുവരെയേ പഠിച്ചിട്ടുള്ളൂ എന്നാണ് ഓർമയെന്നാണ് അദ്ദേഹം പറഞ്ഞത്. എന്നാൽ, നടൻ ഏഴാം ക്ലാസ് വരെ പോയിട്ടുണ്ടെന്ന് സഹപാഠികൾ പറഞ്ഞതായി സാക്ഷരതാ മിഷൻ അറിയിച്ചു.
പഠിക്കണമെന്ന് ആഗ്രഹം ഉണ്ടായിരുന്നെങ്കിലും സ്കൂളിൽ പോകാൻ പുസ്തകവും വസ്ത്രവും ഇല്ല എന്ന അവസ്ഥ എത്തിയപ്പോഴാണ് താൻ പഠിത്തം നിർത്തി തയ്യൽ ജോലിയിലേക്ക് തിരിഞ്ഞതെന്ന് ഇന്ദ്രൻസ് പറഞ്ഞിരുന്നു. അന്ന് ഉള്ളിൽ ഒതുക്കിയ ആഗ്രഹമാണ് നടൻ ഇപ്പോൾ പൂർത്തീകരിക്കാൻ ഒരുങ്ങുന്നത്.
