സുരേഷ് ​ഗോപിയുടെ ഈ വർഷത്തെ ആദ്യ ചിത്രം ഇന്ന് തിയറ്ററുകളിൽ എത്തുകയാണ്. ഗരുഡൻ. എന്ന് പേര് നൽകിയിരിക്കുന്ന ചിത്രം നീതിയ്ക്കായുള്ള പോരാട്ട കഥയാണ് പറയുന്നത്. മാത്രമല്ല 12 വർഷത്തിന് ശേഷം സുരേഷ് ഗോപിയും ബിജു മേനോനും വീണ്ടും ബിഗ് സ്‌ക്രീനിൽ ഒന്നിക്കുന്നതെന്ന പ്രത്യകേതയുമുണ്ട് ചിത്രത്തിന് .നവാ​ഗതനായ അരുൺ വർമയാണ് ചിത്രം സംവിധാനം ചെയ്യുന്നത് .

ചിത്രത്തിൻറെ കേരളത്തിലെ ആദ്യ പ്രദർശനങ്ങൾ രാവിലെ 9 മണിയോടെയേ ആരംഭിച്ചു . എങ്കിലും ഇന്നലെ നടന്ന പ്രിവ്യൂവിൽ നിന്നുള്ള അഭിപ്രായങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്. കൊച്ചി പിവിആർ ലുലുവിൽ ഇന്നലെ രാത്രി 7 മണിക്കായിരുന്നു പ്രിവ്യൂ.
വമ്പൻ അഭിപ്രായങ്ങളാണ് ആദ്യ ഷോയ്ക്ക് ശേഷം വരുന്നത്. അഞ്ചാം പാതിരാ അടക്കമുള്ള ചിത്രങ്ങൾ സംവിധാനം ചെയ്ത മിഥുൻ മാനുവൽ തോമസ് ആണ് ചിത്രത്തിൻറെ രചന നിർവ്വഹിച്ചിരിക്കുന്നത്. മിഥുൻറെ മികവുറ്റ തിരക്കഥയിൽ നന്നായി സംവിധാനം ചെയ്യപ്പെട്ടിരിക്കുന്ന ചിത്രമെന്നാണ് ചിത്രത്തെക്കുറിച്ചുള്ള പൊതു അഭിപ്രായം. ആദ്യാവസാനം പിടിച്ചിരുത്തുന്ന ചിത്രമെന്നും തൃപ്തിപ്പെടുത്തുന്ന ക്ലൈമാക്സ് എന്നും മറ്റു ചിലർ കുറിക്കുന്നു. പ്രകടനങ്ങളിൽ സുരേഷ് ​ഗോപിക്കും ബിജു മേനോനും ഒരേപോലെ കൈയടി ലഭിക്കുന്നുണ്ട്. സമീപകാല മലയാള സിനിമയിലെ ഏറ്റവും മികച്ച ത്രില്ലർ എന്നാണ് മറ്റൊരു എക്സ് പോസ്റ്റ്.

വളച്ചുകെട്ടലുകളില്ലാതെ കഥ പറയുന്ന ചിത്രം മികച്ച സിനിമാറ്റിക് എക്സ്പീരിയൻസ് നൽകുന്ന ഒന്നാണെന്നും അഭിപ്രായങ്ങൾ ഉയരുന്നുണ്ട്. കേന്ദ്ര കഥാപാത്രങ്ങൾ തമ്മിലുള്ള സംഘർഷമാണ് കഥയെ മുന്നോട്ട് നയിക്കുന്നതെന്നാണ് സൂചന. ത്രില്ലർ എന്ന ​ഗണത്തിൻറെ പൾസ് അറിയുന്ന ആളാണ് മിഥുൻ മാനുവൽ തോമസ് എന്ന് തെളിയിച്ച ചിത്രമായിരുന്നു അഞ്ചാം പാതിരാ. വലിയ ജനപ്രീതിയും സാമ്പത്തിക വിജയവും നേടിയ ചിത്രവുമായിരുന്നു ഇത്. വന്നുകൊണ്ടിരിക്കുന്ന അഭിപ്രായങ്ങൾ ശരിയെങ്കിൽ വമ്പൻ ഹിറ്റിലേക്ക് പോകാൻ സാധ്യതയുള്ള ചിത്രമാണിത്.ലീഗൽ ത്രില്ലർ ഗണത്തിൽ പെടുന്ന ചിത്രമാണ് ​ഗരുഡൻ.. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ ആണ് ഗരുഡൻ നിർമ്മിക്കുന്നത്. അഭിരാമിയാണ് നായികയായി എത്തുന്നത്. സുരേഷ് ഗോപി വീണ്ടും പൊലീസ് വേഷത്തിൽ എത്തുകയാണ് ഈ ചിത്രത്തിലൂടെ. നിഷാന്ത് എന്ന കോളേജ് പ്രൊഫസർ ആയാണ് ബിജു മേനോൻ വേഷമിടുന്നത്.

Read Also : ‘ഞാൻ എന്റെ പേര് മാറ്റുന്നു, കാരണം മമ്മൂക്കയുടെ ആ വിളി’ : നടി വിൻസി അലോഷ്യസ്