കൊച്ചി: സ്ത്രീത്വത്തെ അപമാനിച്ചെന്ന പരാതിയിൽ സംവിധായകൻ സനൽകുമാർ ശശിധരനെതിരേ കോടതിയിൽ രഹസ്യമൊഴി നൽകി പരാതിക്കാരിയായ നടി. ആലുവ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിലാണ് നടിയുടെ മൊഴി രേഖപ്പെടുത്തിയത്. സമൂഹ മാധ്യമത്തിലൂടെ തന്നെ അപമാനിച്ചെന്നും സ്ത്രീത്വത്തെ ആക്ഷേപിച്ചെന്നും കാണിച്ചാണ് നടി പരാതി നൽകിയിരുന്നത്.
സ്ത്രീത്വത്തെ അപമാനിക്കുംവിധമുള്ള സനല്കുമാറിന്റെ സാമൂഹികമാധ്യമ പോസ്റ്റുകള് തനിക്ക് മാനഹാനിയുണ്ടാക്കിയെന്നാണ് നടി പരാതി നൽകിയത്. നടിക്കെതിരേ ഒട്ടേറെ പോസ്റ്റുകൾ പ്രതി സമൂഹമാധ്യമങ്ങളിൽ പങ്കുവെച്ചിട്ടുണ്ട്.
ഇയാൾ നിലവിൽ അമേരിക്കയിലാണ് എന്നാണ് വിവരം. മുൻപും നടിയുടെ പരാതിയില് സനല്കുമാര് ശശിധരന് അറസ്റ്റിലായിരുന്നു. നിരന്തരം പിന്തുടര്ന്ന് ശല്യപ്പെടുത്തിയെന്നും ഭീഷണിപ്പെടുത്തിയെന്നുമുള്ള പരാതിയിലാണ് 2022-ല് സനല്കുമാര് ശശിധരനെ പൊലീസ് അറസ്റ്റ് ചെയ്തത്.
