ഗാർഡുകൾ നോക്കിനിൽക്കെ ജയിലിൽ കാണാനെത്തിയ കാമുകിയുടെ സഹായത്തോടെ സ്ത്രീവേഷം കെട്ടി ജയിലിൽ നിന്നും രക്ഷപ്പെട്ട് തടവുകാരൻ. വെനസ്വേലയിലാണ് സംഭവം. വെനസ്വേലക്കാരനായ മാനുവൽ ലോറെൻസോ അവില അൽവാറാഡോ എന്ന 25 കാരനാണ് ജയിലിൽ നിന്നും സ്ത്രീവേഷം കെട്ടി രക്ഷപെട്ടത്. മാർച്ച് 13 -ന് സന്ദർശനസമയം അവസാനിച്ചതിന് തൊട്ടുപിന്നാലെയാണ് ഇയാൾ ജയിൽ ചാടിയത്. സ്ത്രീകളുടെ വേഷവും വിഗ്ഗും ധരിച്ച മാനുവലിനെ തിരിച്ചറിയാൻ ജയിൽ ഗാർഡുകൾക്ക് പോലും കഴിഞ്ഞില്ല. സന്ദർശനസമയം അവസാനിച്ചതിനാൽ നിരവധി സ്ത്രീകൾ അതുവഴി ജയിലിന് പുറത്തേക്ക് പോകുന്നുണ്ടായിരുന്നു. ഇവർക്കൊപ്പമാണ് സ്ത്രീവേഷത്തിൽ മാനുവലും പുറത്തേക്കിറങ്ങിയത്. മാനുവലിന്റെ കാമുകിയാണ് അയാളെ സ്ത്രീവേഷം കെട്ടാനും അവിടെ നിന്നും രക്ഷപ്പെടാനും സഹായിച്ചത്.
ഉച്ചയ്ക്ക് രണ്ട് മണിയോടെയാണ് സംഭവം. സംഭവത്തിൽ നാല് ഗാർഡുകളെ സസ്പെൻഡ് ചെയ്തിട്ടുണ്ട്. മാനുവലിനെ സ്ത്രീവേഷം കെട്ടാനും അവിടെ നിന്നും രക്ഷപ്പെടാനും സഹായിച്ച കാമുകിയായ യുവതിക്കു വേണ്ടിയും തിരച്ചിൽ നടക്കുന്നുണ്ട്. എന്നാൽ, രണ്ടുപേരെയും കണ്ടെത്താൻ പൊലീസിന് കഴിഞ്ഞിട്ടില്ല. കവർച്ച, കൊലപാതകം എന്നീ കുറ്റങ്ങൾക്കാണ് മാനുവൽ ജയിലിലായത്.
