കാൻസർ കണ്ടെത്തുന്ന പുതിയ സംവിധാനം വികസിപ്പിച്ച് അബുദാബി
അബുദാബി : രക്തപരിശോധനയിലൂടെ തന്നെ കാൻസർ വളരെ പ്രാരംഭ ഘട്ടത്തിൽ കണ്ടെത്താൻ സഹായിക്കുന്ന അത്യാധുനിക പരിശോധനാ സംവിധാനം അബുദാബിയിൽ ആരംഭിച്ചു.
ഒറ്റ പരിശോധനയിലൂടെ സ്തനാർബുദം, ശ്വാസകോശാർബുദം ഉൾപ്പെടെ എഴുപതിലധികം തരത്തിലുള്ള കാൻസറുകൾ കണ്ടെത്താൻ കഴിയുന്ന ഈ സംവിധാനം ആരോഗ്യരംഗത്ത് വലിയ മുന്നേറ്റമായാണ് വിലയിരുത്തപ്പെടുന്നത്.
40 വയസ്സിന് മുകളിലുള്ള യുഎഇ പൗരന്മാർക്കും രാജ്യത്ത് താമസിക്കുന്ന പ്രവാസികൾക്കും ഈ പരിശോധന ലഭ്യമാകും.
പ്രായം കൂടുന്തോറും കാൻസർ ബാധിക്കാനുള്ള സാധ്യത വർധിക്കുന്നതിനെ തുടർന്നാണ് ഇത്തരമൊരു നൂതന പരിശോധന അബുദാബിയിൽ നടപ്പിലാക്കുന്നതെന്ന് ആരോഗ്യ അധികൃതർ വ്യക്തമാക്കി.
ഗൾഫ് മേഖലയിലുടനീളം തന്നെ ഇത്തരമൊരു അത്യാധുനിക കാൻസർ സ്ക്രീനിങ് സംവിധാനം ആദ്യമായി അവതരിപ്പിക്കുന്ന നഗരമാണ് അബുദാബി. ‘ട്രൂചെക്ക് ഇൻറ്റെലി’ (TruCheck Intelli) എന്ന പേരിലാണ് ഈ പരിശോധന നടപ്പിലാക്കുന്നത്.
അബുദാബിയിലെ ബുർജീൽ ഹോസ്പിറ്റൽസ് ഉൾപ്പെടെയുള്ള പ്രമുഖ ആരോഗ്യ കേന്ദ്രങ്ങളിലാണ് പരിശോധന ലഭ്യമാകുന്നത്.
95 മുതൽ 98 ശതമാനം വരെ കൃത്യത ഉറപ്പുനൽകുന്ന പരിശോധനയ്ക്ക് തെറ്റായ ഫലങ്ങൾ ലഭിക്കാനുള്ള സാധ്യത വെറും ഒരു ശതമാനം മാത്രമാണെന്നും അധികൃതർ അറിയിച്ചു.
കാൻസർ കണ്ടെത്തുന്നതിലെ ഉയർന്ന വിശ്വാസ്യതയാണ് ഈ സംവിധാനത്തിന്റെ പ്രധാന സവിശേഷത. പരിശോധനയ്ക്കായി രോഗികൾക്ക് പ്രത്യേകമായ തയ്യാറെടുപ്പുകളോ ഉപവാസമോ ആവശ്യമില്ല എന്നതും വലിയ ആശ്വാസമാണ്.
ലളിതമായ രക്തപരിശോധനയിലൂടെ ശരീരത്തിലെ കാൻസർ കോശങ്ങളുടെ സാന്നിധ്യം കണ്ടെത്താൻ സാധിക്കുമെന്നതാണ് ഈ സാങ്കേതികവിദ്യയുടെ പ്രത്യേകത. സാധാരണയായി രോഗലക്ഷണങ്ങൾ പ്രകടമാകുന്നതിന് മുൻപേ തന്നെ കാൻസർ കണ്ടെത്താൻ കഴിയുന്നത് ചികിത്സാ ഫലപ്രാപ്തി വർധിപ്പിക്കുമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.
ബുർജീൽ കാൻസർ ഇൻസ്റ്റിറ്റ്യൂട്ട് സിഇഒയും ഹാർവാർഡ് മെഡിക്കൽ സ്കൂളിലെ പ്രഫസറുമായ ഡോ. ഹുമൈദ് അൽ ഷംസി, ഈ പരിശോധന കാൻസർ ചികിത്സാ രംഗത്ത് വലിയ മാറ്റങ്ങൾ സൃഷ്ടിക്കുമെന്ന് വ്യക്തമാക്കി.
രോഗം പ്രാരംഭ ഘട്ടത്തിൽ തന്നെ തിരിച്ചറിയാൻ സാധിക്കുന്നതിലൂടെ രോഗമുക്തി നേടാനുള്ള സാധ്യത ഗണ്യമായി വർധിക്കുമെന്നും അദ്ദേഹം പറഞ്ഞു.
ആരോഗ്യ രംഗത്തെ നൂതന സാങ്കേതികവിദ്യകൾ സ്വീകരിക്കുന്നതിൽ അബുദാബി മുന്നിൽ നിൽക്കുന്നതിന്റെ തെളിവാണ് ഈ പുതിയ സംവിധാനം.
പ്രതിരോധ ചികിത്സക്കും നേരത്തെ രോഗനിർണയത്തിനും ഊന്നൽ നൽകുന്ന ഈ ശ്രമം, കാൻസറിനെതിരെ സമൂഹതലത്തിൽ വലിയ മുന്നേറ്റമായാണ് വിലയിരുത്തപ്പെടുന്നത്.
