ആധാർ കാർഡ് സൗജന്യമായി പുതുക്കുന്നതിനുള്ള നെട്ടോട്ടത്തിലാണ് ജനങ്ങൾ. അക്ഷയ കേന്ദ്രങ്ങളിലും ആധാർ സേവന കേന്ദ്രങ്ങളിലും ആധാർ പുതുക്കുന്നതിനായി നീണ്ട നിരയാണ്. ഡിസംബർ 14ന് സൗജന്യ സേവനം അവസാനിക്കാനിക്കുമെന്ന വാർത്ത വന്നതിനെ തുടർന്നാണ് തിരക്ക് വർധിച്ചത്. എന്നാൽ മാര്‍ച്ച് 14 വരെ സൗജന്യമായി ആധാർ പുതുക്കാം എന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ അറിയിച്ചു.
ആധാര്‍ കാര്‍ഡിലെ തിരിച്ചറിയല്‍, വിലാസം ഉള്‍പ്പെടെയുള്ള വിവരങ്ങളാണ് സൗജന്യമായി പുതുക്കാൻ കഴിയുക. എന്‍റോള്‍മെന്റ് തിയതി മുതല്‍ 10 വര്‍ഷത്തിലൊരിക്കലെങ്കിലും ആധാര്‍ വിവരങ്ങള്‍ അപ്ഡേറ്റ് ചെയ്യണം എന്നാണ് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യയുടെ നിര്‍ദേശം.
ആധാർ എങ്ങനെ പുതുക്കാം
യുഐഡിഎഐ പോര്‍ട്ടല്‍ വഴി ആധാര്‍ രേഖകള്‍ പുതുക്കുന്നതിനുള്ള സൗകര്യമാണ് ഒരുക്കിയിരിക്കുന്നത്. myaadhaar.uidai.gov.in എന്ന വെബ്‌സൈറ്റില്‍ Document Update ഓപ്ഷന്‍ വഴി രേഖകള്‍ പുതുക്കാം. അക്ഷയ സെന്ററുകള്‍ അടക്കമുള്ള ആധാര്‍ കേന്ദ്രങ്ങളില്‍ പോയി ചെയ്യുന്നതിന് 50 രൂപ നല്‍കണം. തിരിച്ചറിയല്‍, മേല്‍വിലാസ രേഖകളുടെ സഹായത്തോടെയാണ് ഓണ്‍ലൈനായാണ് വിവരങ്ങള്‍ പുതുക്കേണ്ടത്.
ഓണ്‍ലൈനായി വിവരങ്ങള്‍ പുതുക്കുമ്പോള്‍ മൊബൈല്‍ നമ്പര്‍ ആധാറുമായി ബന്ധിപ്പിച്ചിട്ടുണ്ടോ എന്നത് ഉറപ്പാക്കണം. തുടര്‍ന്ന് ലഭിക്കുന്ന ഒടിപി അനുസരിച്ചാണ് തുടര്‍നടപടികള്‍ സ്വീകരിക്കേണ്ടത്. തിരിച്ചറിയല്‍, മേല്‍വിലാസം, ജനനത്തീയതി തുടങ്ങിയവ തെളിയിക്കുന്നതിന് ആവശ്യമായ രേഖകളുടെ സ്‌കാന്‍ ചെയ്ത കോപ്പികള്‍ വേണം. സൈറ്റില്‍ കയറി ഡോക്യുമെന്റ് അപ്ഡേറ്റിൽ ക്ലിക്ക് ചെയ്ത് ചെയ്യുക. തുടര്‍ന്ന് ആധാര്‍ നമ്പര്‍ നല്‍കണം. അപ്ഡേറ്റ് ചെയ്യേണ്ട വിശദാംശങ്ങള്‍ തിരഞ്ഞെടുത്ത് മുന്നോട്ടുപോകുക. ഈ സമയത്താണ് സ്‌കാന്‍ ചെയ്ത കോപ്പികള്‍ അപ്‌ലോഡ് ചെയ്യേണ്ടത്. സബ്മിറ്റ് ചെയ്ത് കഴിഞ്ഞാല്‍ അപ്ഡേറ്റ് റിക്വസ്റ്റ് നമ്പര്‍ ലഭിക്കും. കിട്ടുന്ന അപ്ഡേറ്റ് റിക്വസ്റ്റ് നമ്പര്‍ വഴി അപ്ഡേറ്റ് ഘട്ടങ്ങൾ മനസ്സിലാക്കുക
ആധാർ നിർബന്ധമായും പുതുക്കണം
രാജ്യത്തെ ഏറ്റവും പ്രധാനമായതും അടിസ്ഥാനപരമായിട്ടും ഉള്ള തിരിച്ചറിയൽ രേഖയാണ് ആധാർ കാർഡ്. സാമ്പത്തികം മുതൽ പല മേഖലകളിലെ പ്രവർത്തനങ്ങൾക്ക് ആധാർ കാർഡുകൾ നിർബന്ധമാണ്. കൃത്യമായി ആധാർ വിവരങ്ങൾ പുതുക്കിയില്ലെങ്കിൽ ബാങ്കിങ് മേഖല, സർക്കാർ സേവനങ്ങൾ തുടങ്ങിയയിൽ പ്രതിസന്ധികൾ നേരിടേണ്ടി വരും. പത്ത് വർഷം കൂടുമ്പോൾ ആധാർ രേഖകൾ പുതുക്കണമെന്നാണ് സർക്കാർ നിർദേശം.
