അജ്മീർ: മുത്തച്ഛൻ തെരുവുനായയ്ക്കുനേരെ വെടിയുതിർത്തു, ബുള്ളറ്റ് തറച്ച് കയറിയത് 5 വയസുകാരന്റെ ശ്വാസകോശത്തിൽ. ഗുരുതരമായി പരിക്കേറ്റ 5 വയസുകാരൻ ചികിത്സയിൽ. അജ്മീറിലാണ് സംഭവം നടക്കുന്നത്. അഞ്ച് വയസുകാരന്റെ ശ്വാസ കോശത്തിൽ ഗുരുതര പരിക്കാണ് എയർ ഗണ്ണിൽ നിന്നുള്ള വെടിയേറ്റ് സംഭവിച്ചിരിക്കുന്നത്.
അജ്മീറിലെ ജെഎൽഎൻ ആശുപത്രിയിലാണ്ലാണ് നാല് മണിക്കൂറോളം നീണ്ട സങ്കീർണ ശസ്ത്രക്രിയ നടത്തിയത്. ശ്വാസകോശം തുളച്ച് വയറിൽ കയറിയ നിലയിലായിരുന്നു ബുള്ളറ്റുണ്ടായിരുന്നത്. ശ്വാസകോശത്തിലെ പരിക്കിനെ തുടർന്ന് ശ്വാസം പോലും എടുക്കാൻ സാധിക്കാത്ത നിലയിലായിരുന്നു അഞ്ച് വയസ്സുകാരൻ. ഏതെല്ലാം അന്തരികാവയവങ്ങൾക്ക് പരിക്കുണ്ടെന്നത് അറിയാത്തതിനാൽ അടിയന്തര ശസ്ത്രക്രിയയ്ക്ക് കുട്ടിയെ വിധേയമാക്കുകയായിരുന്നു.
കരൾ, പാൻക്രിയാസ്, ചെറുകുടൽ എന്നിവയിലെല്ലാം ബുള്ളറ്റ് പരിക്കേൽപ്പിച്ച നിലയിലായിരുന്നു. വയറിൽ രക്തം നിറഞ്ഞ നിലയിലുമായിരുന്നു കുട്ടിയുണ്ടായിരുന്നത്. ചെറുകുടലിന്റെ ആദ്യ ഭാഗത്ത് നിന്നാണ് ബുള്ളറ്റ് കണ്ടെത്താനായത്. കുട്ടിയുടെ നില മെച്ചപ്പെട്ടതായാണ് ആരോഗ്യ വിദഗ്ധർ വിശദമാക്കിയത്.
