ലണ്ടനിൽ പോലീസ് വാഹനമിടിച്ച് ഗർഭിണിയായ സ്ത്രീയും ഗർഭസ്ഥ ശിശുവും ദാരുണമായി കൊല്ലപ്പെട്ടു. യുവതി സഞ്ചരിച്ചിരുന്ന വാഹനത്തിൽ അതിവേഗതയിലെത്തിയ പോലീസിന്റെ വാഹനം ഇടിക്കുകയായിരുന്നു. A fully pregnant woman was tragically killed after being hit by a police vehicle in the UK
അപകടത്തെ തുടർന്ന് കാര്‍ മൂന്ന് തവണ മലക്കം മറിഞ്ഞു എന്നാണ് ദൃക്സാക്ഷികള്‍ പറയുന്നത്. വിവരമറിഞ്ഞ് തൊട്ടടുത്ത സ്പോർട്സ് കേന്ദ്രത്തിൽ നിന്നും ഒരാൾ ഓടിയെത്തി അത് തന്റെ ഭാര്യയാണെന്ന് അലമുറയിട്ടു കരഞ്ഞതായി ദൃക്സാക്ഷികൾ പറയുന്നു.
യുവതി ഓടിച്ചിരുന്ന കാര്‍ സട്ക്ലിഫ് പാര്‍ക്ക് സ്‌പോര്‍ട്‌സ് സെന്ററിലേക്ക് തിരിയുമ്പോള്‍ തെറ്റായ ദിശയില്‍ വന്ന പോലീസ് വാഹനം ഇടിക്കുകയായിരുന്നു എന്നാണ് ദൃക്സാക്ഷി പറയുന്നത്.
ലൈറ്റുകള്‍ ഓണ്‍ ചെയ്ത്, അതിവേഗതയിലായിരുന്നു നാല് പോലീസ് കാറുകള്‍ വന്നിരുന്നതെന്നും സംഭവത്തിന് ദൃക്സാക്ഷിയായ ഈ യുവാവ് പറയുന്നു.
അപകടത്തെ തുടർന്ന് ഗർഭിണിയായ സ്ത്രീയും ഗർഭസ്ഥ ശിശുവും തൽക്ഷണം മരണത്തിനു കീഴടങ്ങി .
അപകടം നടന്ന ഉടനെ ലണ്ടൻ ആംബുലൻസ് സർവീസ്, ലണ്ടൻ ഫയർ ബ്രിഗേഡ്, ലണ്ടനിലെ എയർ ആംബുലൻസ് എന്നിവയെല്ലാം സംഭവസ്ഥലത്തെത്തി രക്ഷാപ്രവർത്തനം നടത്തിയെങ്കിലും ഇവരുടെ ജീവൻ രക്ഷിക്കാനായില്ല.
പോലീസ് വാഹനത്തിലുണ്ടായിരുന്ന രണ്ട് പേർക്ക് പരിക്കുകൾ സംഭവിച്ചിട്ടുണ്ടെങ്കിലും ഇത് സാരമുള്ളതല്ല എന്ന് പോലീസ് അറിയിച്ചു.
വ്യാഴാഴ്ച വൈകുന്നേരം നടന്ന അപകടത്തെ കുറിച്ച് പോലീസ് വാച്ച് ഡോഗ് അന്വേഷണം നടത്തി വരുകയാണ്.
