തിരുവനന്തപുരം: നെയ്യാറ്റിൻകരയിലെ ഒരു ആയുർവേദ ഫാർമസിയിലാണ് സംഭവം. ഫാർമസിയുടെ മറവിൽ അരിഷ്ടത്തിൽ ലഹരി കലർത്തി വിൽപന നടത്താൻ തുടങ്ങിയിട്ട് ഏറെ നാളുകളായെന്നാണ് ലഭിക്കുന്ന വിവരം. പിപ്പല്യാസവം, മുസ്താരിഷ്ടം ഇങ്ങനെ പലവിധ പേരുകളിലാണ് അരിഷ്ട വില്പന. ജീവൻ ആയുർവേദ പഞ്ചകർമ്മ ചികിത്സാലയത്തിൻ്റെ മറവിലാണ് ഈ അരിഷ്ട വിൽപന. ഡോക്ടറുടെ പ്രിസ്ക്രിപ്ഷൻ ഇല്ലാതെ തന്നെ ഇവിടെ മരുന്ന് നൽകും. രോഗികൾക്ക് മാത്രം അല്ല, ആർക്കു വേണമെങ്കിലും കിട്ടും. ബിയറിനേക്കാൾ കിക്കാണ് ഇവിടുത്തെ അരിഷ്ടത്തിനെന്നാണ് ഉപയോക്താക്കളുടെ അഭിപ്രായം .
ഒടുവിൽ ഫാർമസിയിൽ എക്സൈസ് പരിശോധന നട‌ത്തി അരിഷ്ടം കസ്റ്റഡിയിലെടുത്തു. സിപിഐഎം പെരുങ്കടവിള ലോക്കൽ കമ്മിറ്റി അംഗം തങ്കരാജിന്റെ ഉടമസ്ഥതയിലുളളതാണ് സ്ഥാപനം. വ്യാപാരി വ്യവസായി സമിതി ജില്ലാ കമ്മിറ്റി അംഗമാണ് ഇയാൾ. അരിഷ്ടം ഉണ്ടാക്കുന്നത് ഒറ്റശേഖരമംഗലത്ത് നിന്നാണെന്ന് ഫാർമസി ജീവനക്കാരൻ പറയുന്നത്. എന്നാൽ അരിഷ്ടത്തിൽ മദ്യം ചേർക്കുന്നുണ്ടോ എന്ന ചോദ്യത്തിന് ജീവനക്കാരന് മറുപടിയില്ല.
കുപ്പിയിൽ നിന്ന് ഗ്ലാസിലേക്ക് ഒഴിച്ചുകൊടുത്താണ് ആയുർവേദ ഫാർമസിയുടെ അരിഷ്ട കച്ചവടം. അരിഷ്ടത്തിൽ ബിയറിനേക്കാൾ ആൽക്കഹോൾ കണ്ടന്റ് കൂടുതലാണെന്ന് പരിശോധനയിൽ കണ്ടെത്തി. 450 മില്ലിയിൽ 10.57 ശതമാനം ആൽക്കഹോൾ അംശം ഉണ്ട്. 650 മില്ലിലിറ്റർ ബിയറിലെ ആൽക്കഹോളിനെക്കാൾ ഇരട്ടിയാണിത്. 450 മില്ലിയ്ക്ക് 70 രൂപ മാത്രമാണ് ഫാർമസി ഈടാക്കുന്നത്.
ബിയറിലെ ആൽക്കഹോൾ കണ്ടെന്റ് വിവരങ്ങൾ ചുവടെ:
ഹെനിക്കൺ – 5 ശതമാനം, കിംഗ് ഫിഷർ പ്രിമിയം – 4.8 ശതമാനം, കിംഗ് ഫിഷർ സ്ട്രോങ് – 8 ശതമാനം, കിംഗ് ഫിഷർ അൾട്രാ മാക്സ് – 7.5 ശതമാനം, കിംഗ് ഫിഷർ അൾട്രാ – 4 ശതമാനം, കിംഗ് ഫിഷർ ബ്ലൂ – 8 ശതമാനം, ബേഡ് മങ്കി – 8 ശതമാനം, ഗോഡ് ഫാദർ ലെജൻഡറി – 7.2 ശതമാനം, ഗോഡ് ഫാദർ പ്രീമിയം – 6.5 ശതമാനം, ഗോഡ് ഫാദർ സൂപ്പർ 8 ശതമാനം, ബീ യങ്ങ് – 7.2 ശതമാനം, ബ്രോക്കോഡ് – 15 ശതമാനം, സിമ്പ സ്ട്രോങ്ങ് – 5.5 ശതമാനം,സിമ്പ സ്റ്റൗട്ട് – 7 ശതമാനം, ബട്ട് വൈസർ – 5 ശതമാനം.
