ചെന്നൈ: ചിന്നക്കനാലില്‍ നിന്ന് മയക്കുവെടിവെച്ച് തമിഴ്‌നാട്ടിലേക്ക് കൊണ്ടുപോയ അരിക്കൊമ്പന് കോതയാറില്‍ സുഖമായി കഴിയുന്നുവെന്ന് വനംവകുപ്പ്. രണ്ടു കുട്ടിയാനകളുള്‍പ്പെടെ പത്തംഗ കാട്ടാനക്കൂട്ടത്തോടൊപ്പമാണ് അരിക്കൊമ്പന്റെ സുഖവാസം. ആനക്കൂട്ടത്തോട് ഇണങ്ങിയതിനാല്‍ കൊമ്പനെ നിരീക്ഷിക്കുന്നതിന് ഏര്‍പ്പെടുത്തിയ വാച്ചര്‍മാരുടെ എണ്ണം തമിഴ്‌നാട് വനംവകുപ്പ് കുറച്ചു.
ജൂണ്‍ മുതല്‍ അരിക്കൊമ്പന് കോതയാറില്‍ തന്നെ തുടരുകയാണ്. നാല് മാസമായി ചിന്നക്കനാലില്‍ നിന്ന് അരിക്കൊമ്പനെ നാടുകടത്തിയിട്ട്. കേരളത്തിലും തമിഴ്‌നാട്ടിലുമായുളള അ?ഗസ്ത്യാര്‍കൂടത്തിലാണ് കോതയാര്‍ വനമേഖല. ഇവിടെ നിന്ന് കേരളത്തിലെ വനമേഖലയിലേക്ക് ഇറങ്ങാനുളള സാധ്യത തമിഴ്‌നാട് വനംവകുപ്പ് തളളിക്കളയുന്നില്ല.
കടുവാസങ്കേതത്തില്‍ കോതയാറില്‍ പുല്ലെല്ലാം തിന്ന് ഉഷാറായി നില്‍ക്കുന്ന അരിക്കൊമ്പന്റെ ദൃശ്യങ്ങള്‍ നേരത്തെ തമിഴ്‌നാട് വനം വകുപ്പ് പുറത്തുവിട്ടിരുന്നു. ചിന്നക്കനാലില്‍ ആഴ്ചയിലൊരിക്കലെങ്കിലും ജനവാസമേഖലയില്‍ അരിക്കൊമ്പന് എത്തുമായിരുന്നു. അവിടെ നിന്ന് പിടികൂടി പെരിയാറിലേക്ക് മാറ്റിയപ്പോഴും അരി തേടിയുളള കൊമ്പന്റെ ശീലത്തില്‍ മാറ്റം വരുത്തിയിരുന്നില്ല.
മേഘമലയിലെ എസ്റ്റേറ്റില്‍ ഇറങ്ങി നാശനഷ്ടങ്ങള്‍ ഉണ്ടാക്കിയ അരിക്കൊമ്പന് കുമളിയിലേക്കും കമ്പത്തേക്കും നടന്നെത്തിയിരുന്നു. കമ്പത്ത് നിന്ന് മയക്കുവെടിവെച്ച് കളക്കാട്ടേക്ക് മാറ്റിയ അരിക്കൊമ്പന് വലിയ മാറ്റമാണുണ്ടായത്. തുമ്പിക്കൈയ്യിലെ മുറിവും തുടര്‍ച്ചയായി ഏറ്റ മയക്കുവെടികളും കൊമ്പന്റെ ആരോഗ്യത്തില്‍ ആശങ്കയുണ്ടാക്കിയിരുന്നു.
