മലപ്പുറം: കാലിക്കറ്റ് സർവകലാശാലയുടെ ഇന്റർസോൺ കലോത്സവത്തിനിടെ സംഘര്‍ഷം. വളാഞ്ചേരി മജ്‌ലിസ്‌ ആർട്‌സ്‌ ആൻഡ്‌ സയൻസ്‌ കോളജിൽ വെച്ചാണ് സംഭവം. ഇന്ന് പുലർച്ചെ എംഎസ്എഫ്-എസ്എഫ്ഐ പ്രവർത്തകർ തമ്മിലാണ് ഏറ്റുമുട്ടിയത്.
സംഘർഷത്തിൽ രണ്ട് പൊലീസുകരുള്‍പ്പെടെ എട്ട് പേര്‍ക്ക് പരിക്കേറ്റു. ചെറിയ വാക്കുതർക്കം സംഘര്‍ഷത്തില്‍ കലാശിക്കുകയായിരുന്നു. അഞ്ച് ദിവസത്തെ കലോത്സവത്തിൽ ഇന്നലെയാണ് സ്റ്റേജ് മത്സരങ്ങള്‍ ആരംഭിച്ചത്. ഇതിനിടെയാണ് സംഘര്‍ഷമുണ്ടായത്.
ക്യാമ്പസിലെ സംഘടന പ്രശ്‌നങ്ങളും മറ്റും ഉയര്‍ത്തി കലോത്സവത്തില്‍ പങ്കെടുക്കാനെത്തുന്ന വിദ്യാർഥികളെ എംഎസ്എഫ് തിരഞ്ഞു പിടിച്ചു ആക്രമിക്കുന്നുവെന്നാണ് എസ്എഫ്ഐ ആരോപിക്കുന്നത്. അതേസമയം ക്യാമ്പസിലുള്ള ചെറിയ പ്രശ്‌നങ്ങളുടെ പേരിൽ കലോത്സവ വേദികളിൽ എസ്എഫ്ഐ പ്രകോപനം ഉണ്ടാക്കുന്നവെന്ന് എംഎസ്എഫും ആരോപിച്ചു.
