ചെന്നൈ: അച്ഛൻറെ കൺമുന്നിൽ ഗേറ്റ് തകർന്നുവീണ് ഏഴ് വയസ്സുകാരിക്ക് ദാരുണാന്ത്യം. ചെന്നൈ നംഗനല്ലൂർ സ്വദേശി സമ്പത്തിൻറെ മകൾ ഐശ്വര്യ ആണ് ഗേറ്റിനടിയിൽപ്പെട്ട് മരിച്ചത്.
ഇന്നലെ വൈകീട്ട് ഐശ്വര്യയെ സ്കൂളിൽ നിന്ന് കൂട്ടിക്കൊണ്ടുവരുമ്പോഴായിരുന്നു ദാരുണ സംഭവം. പ്രദേശത്ത് കട നടത്തുന്ന പെൺകുട്ടിയുടെ പിതാവ് തന്നെയാണ് ദിവസവും കുട്ടിയെ ഇരുചക്ര വാഹനത്തിൽ സ്കൂളിലേക്ക് കൊണ്ടുപോവുകയും വിളിക്കാൻ വരുന്നതും.
ഇന്നലെയും പതിവുപോലെ വീട്ടിലേക്ക് കൊണ്ടുവന്നു സമ്പത്ത് ബൈക്ക് ഉള്ളിലേക്ക് എടുത്തപ്പോൾ ഇരുമ്പ് ഗേറ്റ് അടയ്ക്കാൻ ശ്രമിച്ചതാണ് കുട്ടി. പെട്ടെന്ന് ഗേറ്റ് ചരിഞ്ഞ് കുട്ടിയുടെ മുകളിലേക്ക് വീഴുകയായിരുന്നു.
രക്തം വാർന്ന നിലയിൽ ഉടൻ തന്നെ ഐശ്വര്യയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കുട്ടിയുടെ സംസ്കാരം ഇന്ന് നടക്കും.
