ശങ്കു എന്ന കുഞ്ഞിന്റെ വീഡിയോ വ്യാപകമായി പ്രചരിച്ചിരുന്നു
തിരുവനന്തപുരം: അങ്കണവാടിയില് ഉപ്പുമാവിന് പകരമായി ബിരിയാണിയും പൊരിച്ച കോഴിയും വേണമെന്ന കുഞ്ഞിന്റെ ആവശ്യം പരിഗണിക്കാനൊരുങ്ങി ആരോഗ്യ വകുപ്പ് മന്ത്രി വീണാ ജോര്ജ്. അങ്കണവാടിയിലെ ഭക്ഷണമെനു പരിഷ്ക്കരിക്കുമെന്ന് മന്ത്രി വീണാ ജോര്ജ് അറിയിച്ചു. ബിരിയാണിയും പൊരിച്ച കോഴിയും വേണമെന്ന ശങ്കു എന്ന കുഞ്ഞിന്റെ വീഡിയോ വ്യാപകമായി പ്രചരിച്ചിരുന്നു.( Health Minister reacts Kuttyshanku’s video)
ശങ്കു വളരെ നിഷ്കളങ്കമായിട്ട് പറഞ്ഞ ആവശ്യം ഉൾക്കൊള്ളുന്നുവെന്നാണ് മന്ത്രി പറഞ്ഞത്. കുട്ടികള്ക്ക് പോഷകാഹാരം ഉറപ്പ് വരുത്താനായി വിവിധ തരം ഭക്ഷണങ്ങള് അങ്കണവാടി വഴി വിതരണം ചെയ്യുന്നുണ്ട്. ഈ സര്ക്കാരിന്റെ കാലത്ത് അങ്കണവാടി വഴി മുട്ടയും പാലും നല്കുന്ന പദ്ധതി നടപ്പിലാക്കി. അത് വിജയകരമായി നടക്കുന്നുണ്ട് എന്നും മന്ത്രി ചൂണ്ടിക്കാട്ടി.
ശിശുവികസന വകുപ്പിന്റെ ഏകോപനത്തില് തദ്ദേശ സ്ഥാപനങ്ങള് സ്വന്തം നിലയില് അങ്കണവാടികളില് പലതരം ഭക്ഷണങ്ങള് നല്കുന്നുണ്ട്. ശങ്കുവിന്റെ അഭിപ്രായം പരിഗണിച്ച് ഭക്ഷണ മെനു പരിശോധിക്കുമെന്നും മന്ത്രി അറിയിച്ചു. ശങ്കുവിനും അമ്മയ്ക്കും അങ്കണവാടി ജീവനക്കാര്ക്കും മന്ത്രി സ്നേഹാഭിവാദ്യങ്ങൾ അറിയിക്കുകയും ചെയ്തു.
