പത്തനംതിട്ട: പത്തനംതിട്ടയിൽ അഞ്ചുമാസം ഗർഭിണിയായ പ്ലസ് ടു വിദ്യാർത്ഥിനി മരിച്ച സംഭവത്തിൽ സഹപാഠിയെ അറസ്റ്റ് ചെയ്ത് പോലീസ്. ആലപ്പുഴ നൂറനാട് സ്വദേശി അഖിലിനെയാണ് അറസ്റ്റ് ചെയ്തത്. പെൺകുട്ടിയുടെ വീട്ടിൽ വെച്ച് ലൈംഗികമായി പീഡിപ്പിച്ചെന്ന് പ്രതി മൊഴി നൽകിയതിന്റെ അടിസ്ഥാനത്തിലാണ് അറസ്റ്റ് രേഖപ്പെടുത്തിയത്.(Pathanamthitta Plus Two student death; Classmate arrested)
പ്രതി അഖിലിന് പതിനെട്ട് വയസും ആറ് മാസവുമാണ് പ്രായമെന്ന് പൊലീസ് അറിയിച്ചു. പെൺകുട്ടിയുടെ മരണത്തെ തുടർന്ന് സഹപാഠിയെ പോലീസ് വ്യാഴാഴ്ച ചോദ്യംചെയ്തിരുന്നു. വിദ്യാർത്ഥിനിയുമായി പ്രണയത്തിലായിരുന്നുവെന്ന് പ്രതി മൊഴി നല്കിയിരുന്നു.
ഗര്ഭസ്ഥശിശുവിന്റെ പിതൃത്വം തെളിയിക്കാനുള്ള ഡിഎന്എ പരിശോധനയ്ക്കായി സഹപാഠിയുടെ രക്തസാമ്പിളും പൊലീസ് ശേഖരിച്ചിരുന്നു. ഇതിന്റെ ഫലം ലഭിക്കാന് ഇനിയും സമയമെടുക്കുമെന്ന് പൊലീസ് അറിയിച്ചു.
ഈ മാസം 22 ആം തീയതിയാണ് പനിയെ തുടർന്നുള്ള അണുബാധയ്ക്ക് പ്ലസ് ടു വിദ്യാർഥിനി ആശുപത്രിയിൽ ചികിത്സ തേടിയത്. തുടർന്ന് ആലപ്പുഴ വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ച പെൺകുട്ടിയുടെ മരണം തിങ്കളാഴ്ച പുലർച്ചെ സംഭവിക്കുകയായിരുന്നു. എന്നാൽ സംശയം തോന്നി നടത്തിയ പോസ്റ്റ്മോർട്ടത്തിലാണ് അഞ്ചുമാസം ഗർഭിണിയാണെന്ന് കണ്ടെത്തിയത്.
