വനാതിർത്തിയിൽ പരുങ്ങി നിന്ന് യുവാക്കൾ ; ഡാൻസാഫ് ൻ്റെ പരിശോധനയിൽ കണ്ടെത്തിയത് എം.ഡി.എം.എ ; രണ്ട് യുവാക്കൾ പിടിയിൽ

സുൽത്താൻ ബത്തേരിയിൽ രണ്ട് യുവാക്കൾ മാരക മയക്കുമരുന്നായ എം.ഡി.എം.എയുമായി ഡാൻസാഫ് സംഘത്തിന്റെ പിടിയിൽ. നമ്പ്യാർകുന്ന് മുളക്കൽ പുള്ളത്ത് ജിഷ്ണു (29), ബത്തേരി റഹ്മത്ത് നഗർ മേനകത്ത് മെഹബൂബ് (26) എന്നിവരാണ് രഹസ്യ വിവരത്തിന്റെ അടിസ്ഥാനത്തിൽ ഡിസ്ട്രിക്റ്റ് ആന്റി നാർകോട്ടിക്‌സ് സ്‌പെഷ്യൽ ആക്ഷൻ ഫോഴ്‌സ് പിടികൂടിയത്. ഇവരെ പിന്നീട് നൂൽപ്പുഴ പോലീസിന് കൈമാറി. ഇവരിൽ നിന്ന് 12.8 ഗ്രാം എം.ഡി.എം.എ പിടിച്ചെടുത്തതായി നൂൽപ്പുഴ പോലീസ് അറിയിച്ചു.

കഴിഞ്ഞ ദിവസം സന്ധ്യയോടെ കേരള-തമിഴ്‌നാട് അതിർത്തിയിലെ പാട്ടവയലിന് അടുത്ത പ്രദേശമായ ചെട്ട്യാലത്തൂർ ബസ് സ്‌റ്റോപ്പിൽ ഇരിക്കുകയായിരുന്ന യുവാക്കളെ സംശയത്തെ തുടർന്ന് ഡാൻസാഫ് സംഘം പരിശോധിക്കുകയായിരുന്നു. അതിർത്തിയിൽ സ്വകാര്യ വാഹനങ്ങൾ നിരന്തരം പരിശോധന നടത്തുന്നതിനാൽ മയക്കുമരുന്നു കടത്തുകാർ ലൈൻബസുകളെ അടക്കം ആശ്രയിക്കുന്നതായുള്ള വിവരത്തെ തുടർന്ന് പോലീസും എക്‌സൈസും പരിശോധന പൊതുയാത്ര വാഹനങ്ങളിലേക്കും വ്യാപിച്ചിട്ടുണ്ട്. അതിർത്തിയ്ക്ക് അടുത്ത പ്രദേശങ്ങളിൽ ബസുകളിൽ വന്നിറങ്ങുന്ന മയക്കുമരുന്ന് കടത്ത് സംഘങ്ങൾ ഉദ്യോഗസ്ഥരുടെ കണ്ണുവെട്ടിക്കാൻ കാൽനടയായി കേരളത്തിലേക്ക് എത്താൻ ശ്രമിക്കാറുണ്ട്.

English summary : The young men are sitting on the edge of the forest; Dansaf’s test found MDMA; Two youths arrested