ഇടുക്കി കല്ലാറിൽ വനം വകുപ്പ് ഓഫീസിന്റെ തൊട്ടടുത്തു നിന്നും ചന്ദനമരം മുറിച്ച് കടത്താൻ ശനിയാഴ്ച പുലർച്ചെ നടന്ന ശ്രമം വനം വകുപ്പ് ഉദ്യോഗസ്ഥർ അറിഞ്ഞത് വൈകീട്ട് അഞ്ചിന്. Attempt to cut sandalwood tree in Kallar.
33 സെന്റീമീറ്റർ വണ്ണവും 10 വർഷം പഴക്കവുമുള്ള മരമാണ് മുറിച്ചുകടത്താൻ ശ്രമിച്ചത്. മരത്തിന്റെ മുകൾഭാഗം മുറിച്ച് നിലത്തിട്ട നിലയിലാണ്.
കല്ലാറിൽ പ്രവർത്തിക്കുന്ന ചിന്നാർ ഫോറസ്റ്റ് സെക്ഷൻ ഓഫീസിന് 150 മീറ്റർ മാത്രം അകലെയുള്ള കെ.എസ്.ഇ.ബി.യുടെ ഉടമസ്ഥതയിലുള്ള ഭൂമിയിൽ നിന്ന ചന്ദനമരമാണ് മുറിച്ച് കടത്തുവാൻ ശ്രമിച്ചത്.
മുകൾഭാഗം മുറിച്ചശേഷം അടിവശം മുറിക്കുവാൻ ശ്രമിക്കുന്നതിനിടെ തൊട്ടടുത്തുള്ള വഴിയിലൂടെ വാഹനങ്ങൾ കടന്നുപോയതോടെ മോഷ്ടാക്കൾ ശ്രമം ഉപേക്ഷിക്കുകയായിരുന്നു. നേരം പുലർന്നതോടെ സംഭവം ശ്രദ്ധയിൽപ്പെട്ട നാട്ടുകാർ കെ.എസ്.ഇ.ബി.യുടെ ഡാം സുരക്ഷാ ജീവനക്കാരെ വിവരം അറിയിക്കുകയായിരുന്നു.
കെ.എസ്.ഇ.ബി. സെക്യൂരിറ്റി ജീവനക്കാർ വിഷയം ഉന്നത ഉദ്യോഗസ്ഥരെ ധരിപ്പിച്ചതിനെ തുടർന്ന് വൈകുന്നേരത്തോടുകൂടിയാണ് ചിന്നാർ ഫോറസ്റ്റ് സെക്ഷനിൽനിന്നും ഉദ്യോഗസ്ഥർ എത്തിയത്.
