മലയാളി താരമായ സജന സജീവന്റെ അന്താരാഷ്ട്ര അരങ്ങേറ്റ മത്സരമായിരുന്ന, ബംഗ്ലാദേശിനെതിരായ അഞ്ച് ടി20 മത്സരങ്ങളടങ്ങിയ പരമ്പരയിലെ ആദ്യ മത്സരത്തില് ഇന്ത്യക്ക് തകർപ്പൻ ജയം. ഇന്ത്യന് വനിതകള് നിശ്ചിത 20 ഓവറില് ഏഴ് വിക്കറ്റ് നഷ്ടത്തില് 145 റണ്സ് നേടി. ബംഗ്ലാദേശിന്റെ മറുപടി എട്ട് വിക്കറ്റ് നഷ്ടത്തില് 101-ല് അവസാനിച്ചു. 11 പന്തുകള് നേരിട്ട സജന രണ്ട് ഫോര് ഉള്പ്പെടെ 11 റണ്സെടുത്തു.
ടോസ് നേടി ബാറ്റിങ് തിരഞ്ഞെടുത്ത ഇന്ത്യന് വനിതകള് നിറഞ്ഞാടുകയായിരുന്നു. യസ്തിക ഭാട്യ (29 പന്തില് 36), ക്യാപ്റ്റന് ഹര്മന്പ്രീത് കൗര് (22 പന്തില് 30), ഷെഫാലി വര്മ (22 പന്തില് 31), റിച്ച ഘോഷ് (17 പന്തില് 23), സജന സജീവന് (11) എന്നിവര് രണ്ടക്കം കടന്നു. മറുപടി ബാറ്റിങ്ങിനിറങ്ങിയ ബംഗ്ലാദേശിനെ നാലോവറില് 18 റണ്സ് വഴങ്ങി മൂന്ന് വിക്കറ്റുകള് നേടിയ രേണുക താക്കൂര് സിങ്ങാണ് തകര്ത്തത്.
