ഡൽഹിയിൽ ചാർട്ടേഡ് അക്കൗണ്ടന്റിനെ ഹണി ട്രാപ്പിൽ കുടുക്കി തട്ടിക്കൊണ്ടുപോയി
തെക്കൻ ഡൽഹിയിലെ അതീവ സുരക്ഷയുള്ള സൈനിക് ഫാംസ് മേഖലയിൽ പ്രായമായ ചാർട്ടേഡ് അക്കൗണ്ടന്റിനെ ഹണി ട്രാപ്പിൽ കുടുക്കി ക്രൂരമായി മർദിക്കുകയും തട്ടിക്കൊണ്ടുപോയി കവർച്ച നടത്തുകയും ചെയ്ത സംഭവത്തിന്റെ ഞെട്ടിക്കുന്ന വിവരങ്ങളാണ് ഇപ്പോൾ പുറത്തുവരുന്നത്.
72 വയസ്സുകാരനായ വയോധികനെ ലക്ഷ്യമിട്ട് ആസൂത്രിതമായ പദ്ധതി തയ്യാറാക്കിയാണ് പ്രതികൾ കുറ്റകൃത്യം നടത്തിയത്. കേസിൽ സേവനത്തിലിരിക്കുന്ന ഒരു സൈനികൻ ഉൾപ്പെടെയുള്ള നാലംഗ സംഘത്തെ ഡൽഹി പൊലീസ് സാഹസികമായി പിടികൂടി.
രാജ്യതലസ്ഥാനത്തെ നടുക്കിയ ഈ സംഭവത്തിൽ സൈനികനായ സുരേന്ദർ, കൽപ്പന കുമാരി, കുൽദീപ്, സുശീൽ എന്നിവരാണ് പിടിയിലായത്. കൃത്യമായ ആസൂത്രണത്തോടെ നടത്തിയ ഈ കവർച്ചാ നാടകം ഗുണ്ടാ സിനിമകളെ വെല്ലുന്ന രീതിയിലായിരുന്നു അരങ്ങേറിയത്.
ഈ കുറ്റകൃത്യത്തിന് പിന്നിലെ പ്രധാന സൂത്രധാരർ ഹരിയാന സ്വദേശിയായ സുരേന്ദറും ഡൽഹി സ്വദേശിനിയായ കൽപ്പന കുമാരിയുമാണ്. വിവാഹമോചിതരായിരുന്ന ഇരുവരും ഇൻസ്റ്റഗ്രാം വഴിയാണ് പരിചയപ്പെട്ടതും പ്രണയത്തിലായതും.
തുടർന്ന് 2025 നവംബറിൽ ഇവർ ഒരു ക്ഷേത്രത്തിൽ വെച്ച് വിവാഹിതരായി. മഥുരയിൽ സൈനികനായി ജോലി ചെയ്തിരുന്ന സുരേന്ദർ അവധി കഴിഞ്ഞ് ജോലിയിൽ പ്രവേശിക്കാതെ ഈ തട്ടിപ്പിനായി കൂട്ടുനിൽക്കുകയായിരുന്നു.
വയോധികനായ ചാർട്ടേഡ് അക്കൗണ്ടന്റിനെ ഹണി ട്രാപ്പിൽ കുടുക്കാൻ കൽപ്പനയെ മുന്നിൽ നിർത്തിയാണ് സംഘം പദ്ധതിയിട്ടത്. ഇതിനായി സുരേന്ദറിന്റെ സുഹൃത്തുക്കളായ കുൽദീപിനെയും സുശീലിനെയും സംഘത്തിൽ ചേർത്തു.
മെയ് രണ്ടിന് വൈകുന്നേരം വയോധികൻ തന്റെ വീട്ടിൽ തനിച്ചായിരുന്ന സമയത്താണ് കൽപ്പന അദ്ദേഹത്തെ സന്ദർശിക്കാനായി എത്തിയത്. നേരത്തെ പരിചയമുണ്ടായിരുന്ന കൽപ്പനയ്ക്കൊപ്പം മറ്റ് മൂന്ന് പ്രതികളും അതിക്രമിച്ചു കയറുകയും വയോധികനെ ബലം പ്രയോഗിച്ച് കീഴ്പ്പെടുത്തുകയുമായിരുന്നു.
ടേപ്പ് ഉപയോഗിച്ച് കൈകാലുകൾ ബന്ധിച്ച പ്രതികൾ ഇദ്ദേഹത്തെ ക്രൂരമായി മർദിച്ചു. തുടർന്ന് വീട്ടിലെ അലമാരയിൽ സൂക്ഷിച്ചിരുന്ന അഞ്ചു ലക്ഷം രൂപയും മൂന്ന് സ്വർണ്ണ മോതിരങ്ങളും മറ്റ് വിലപിടിപ്പുള്ള വസ്തുക്കളും അവർ കവർന്നു. ഇദ്ദേഹത്തിന്റെ പഴ്സും അതിലുണ്ടായിരുന്ന ആധാർ കാർഡ്, ഡ്രൈവിങ് ലൈസൻസ് തുടങ്ങിയ പ്രധാന രേഖകളും സംഘം കൈക്കലാക്കി.
വീട്ടിൽ വെച്ച് തുക ലഭിച്ചതിന് പിന്നാലെ വയോധികനെ അദ്ദേഹത്തിന്റെ തന്നെ കാറിൽ കയറ്റി സംഘം തട്ടിക്കൊണ്ടുപോയി. ഏകദേശം ഒന്നര മണിക്കൂറോളം മീററ്റ് ഭാഗത്തേക്ക് യാത്ര ചെയ്ത ഇവർ 50 ലക്ഷം രൂപ മോചനദ്രവ്യമായി ആവശ്യപ്പെട്ടു. പണം നൽകിയില്ലെങ്കിൽ വധിക്കുമെന്നായിരുന്നു ഭീഷണി.
വയോധികനെ കൊണ്ട് തന്നെ സുഹൃത്തുക്കളെ വിളിപ്പിക്കുകയും തനിക്ക് അപകടം പറ്റിയെന്നും 15 ലക്ഷം രൂപ ഉടൻ വേണമെന്നും പറയിപ്പിക്കുകയും ചെയ്തു. എന്നാൽ പ്രതീക്ഷിച്ച തുക ലഭിക്കില്ലെന്ന് ഉറപ്പായതോടെ ഹരിയാനയിലെ ഫിറോസ്പൂർ ജിർക്ക ഹൈവേയ്ക്ക് സമീപം കാറും വയോധികനെയും ഉപേക്ഷിച്ച് പ്രതികൾ കടന്നുകളഞ്ഞു.
ഹൈവേയിലെ ഒരു കടയിൽ അഭയം പ്രാപിച്ച വയോധികൻ വിവരമറിയിച്ചതിനെ തുടർന്ന് മെയ് മൂന്നിന് നെബ് സരായ് പൊലീസ് കേസ് രജിസ്റ്റർ ചെയ്തു. പൊലീസ് നടത്തിയ ശാസ്ത്രീയ അന്വേഷണത്തിനൊടുവിൽ പ്രതികളെ മഥുരയിൽ നിന്നും ഹരിയാനയിൽ നിന്നുമായി പിടികൂടി.
കവർച്ച ചെയ്ത തുകയുടെ ഭൂരിഭാഗവും ആഭരണങ്ങളും കൃത്യത്തിനായി ഉപയോഗിച്ച എയർഗണും പൊലീസ് കണ്ടെടുത്തു. സൈനിക സേവനത്തിലിരിക്കുന്ന ഒരാൾ ഇത്തരം ക്രിമിനൽ സംഘത്തിന്റെ ഭാഗമായത് ഗൗരവത്തോടെയാണ് അന്വേഷണ ഏജൻസികൾ കാണുന്നത്. പ്രതികൾ സമാനമായ മറ്റ് തട്ടിപ്പുകൾ നടത്തിയിട്ടുണ്ടോ എന്ന കാര്യത്തിൽ കൂടുതൽ അന്വേഷണം പുരോഗമിക്കുകയാണ്.
