മതമൈത്രിയുടെ മനോഹരമായ സന്ദേശവുമായി അർത്തുങ്കൽ തിരുനാളിന് കൊടിക്കയർ എത്തിച്ച് നടൻ അനൂപ് ചന്ദ്രൻ
ചേർത്തല: മതമൈത്രിയുടെ മനോഹരമായ സന്ദേശവുമായി അർത്തുങ്കൽ സെന്റ് ആൻഡ്രൂസ് ബസിലിക്കയിൽ വിശുദ്ധ സെബസ്ത്യാനോസിന്റെ തിരുനാളിനുള്ള കൊടിക്കയർ നടൻ അനൂപ് ചന്ദ്രന്റെ വീട്ടിൽ നിന്ന് ആഘോഷപൂർവം എത്തിച്ചു.
പള്ളിമുറ്റത്ത് കൊടി ഉയർത്തുന്നതിനുള്ള കൊടിക്കയറാണ് ചേർത്തല തെക്ക് പഞ്ചായത്ത് 12-ാം വാർഡ് കാരികാട്ട് സന്നിധാനം വീട്ടിൽ നിന്ന് ഇന്നലെ എത്തിച്ചത്.
മന്ത്രി പി. പ്രസാദ് അനൂപ് ചന്ദ്രനൊപ്പം വീട്ടിൽ നിന്ന് പള്ളി വരെ യാത്രയിൽ പങ്കുചേർന്നു. എറണാകുളം മട്ടാഞ്ചേരിയിൽ നിർമ്മിച്ച കൊടിക്കയർ കഴിഞ്ഞ ദിവസം അനൂപിന്റെ വീട്ടിലെത്തിച്ച് പൂജാമുറിയിൽ സൂക്ഷിച്ചിരുന്നു.
തുടർന്ന് വാദ്യമേളങ്ങളുടെയും മുത്തുക്കുടകളുടെയും അകമ്പടിയോടെ തലച്ചുമടായി കൊണ്ടുവന്ന് ഇന്നലെ വൈകിട്ട് ഏഴ് മണിയോടെ പള്ളിയിൽ എത്തിച്ചു. പള്ളിയിലെത്തിയ കൊടിക്കയർ പള്ളി അധികൃതർ ഏറ്റുവാങ്ങി അൾത്താരയിൽ വച്ചു.
എല്ലാ വർഷവും തിരുനാളിനോടനുബന്ധിച്ച് നടക്കുന്ന പ്രദക്ഷിണത്തിൽ രൂപക്കൂട് ചുമക്കുന്നവരിൽ ഒരാളായി അനൂപ് ചന്ദ്രൻ ഉണ്ടാകാറുണ്ടെന്ന് പള്ളി അധികൃതർ പറഞ്ഞു.
അർത്തുങ്കൽ പള്ളിയെയും ശബരിമലയെയും കോർത്തിണക്കിയ ആഗോള അയ്യപ്പ സംഗമത്തിൽ മുഖ്യമന്ത്രി പിണറായി വിജയൻ നടത്തിയ പരാമർശമാണ് കൊടിക്കയർ സമർപ്പിക്കാൻ തനിക്ക് പ്രചോദനമായതെന്ന് അനൂപ് ചന്ദ്രൻ വ്യക്തമാക്കി.
മുൻ വർഷങ്ങളിലൊക്കെ തിരുനാളിനായി വീടുകളിൽ നിന്ന് കൊടിക്കയർ എത്തിക്കുന്ന പതിവുണ്ടായിരുന്നുവെങ്കിലും പിന്നീട് അത് നിലച്ചിരുന്നു.
ഈ പാരമ്പര്യം വീണ്ടും ആരംഭിച്ചതോടെ അടുത്ത വർഷത്തേക്ക് കൊടിക്കയർ സമർപ്പിക്കാൻ നിരവധി പേർ തയ്യാറായി മുന്നോട്ട് വന്നിട്ടുണ്ടെന്ന് ബസിലിക്ക റെക്ടർ ഫാ. യേശുദാസ് കാട്ടുങ്കൽ തയ്യിൽ പറഞ്ഞു. ഈ മാസം 10നാണ് തിരുനാളിന് കൊടിയേറുക.
English Summary:
Actor Anoop Chandran presented the ceremonial flag rope for the feast of St. Sebastian at Arthunkal St. Andrew’s Basilica, symbolizing religious harmony. The rope was brought from his residence in a festive procession and received by church authorities. Inspired by remarks linking Arthunkal Church and Sabarimala, the event also revived an old tradition of offering flag ropes from homes.
arthunkal-basilica-feast-flag-rope-anoop-chandran
Arthunkal Basilica, St Sebastian Feast, Anoop Chandran, religious harmony, Kerala news, Christian festival, Arthunkal church, communal harmony
