കൊച്ചി: കെ.എസ്.ആര്‍.ടി.സിയുടെ ആസ്തികള്‍ മൂല്യനിര്‍ണയം നടത്തണമെന്ന് ഹൈക്കോടതി ഉത്തരവ്. സ്വകാര്യ ഏജന്‍സിയെ ഉപയോഗിച്ചു വേണം മൂല്യ നിര്‍ണയം നടത്താന്‍. ഒരുമാസത്തിനകം റിപ്പോര്‍ട്ട് നല്‍കണമെന്നും ഹൈക്കോടതി നിര്‍ദേശിച്ചു.
കെ.എസ്.ആര്‍.ടി.സിയിലെ ജീവനക്കാര്‍ വിവിധ സൊസൈറ്റികളില്‍ നിന്നും മറ്റും വായ്പ എടുക്കാറുണ്ട്. ഇതിന്റെ തിരിച്ചടവ് കെ.എസ്.ആര്‍.ടി.സി. ശമ്പളത്തില്‍ നിന്ന് പിടിച്ച് സൊസൈറ്റിയിലേക്ക് അടക്കുകയാണ് പതിവ്. എന്നാല്‍ കഴിഞ്ഞ കുറച്ചു നാളുകളായി ഇത് ഉണ്ടായിട്ടില്ല. ഇതേത്തുടര്‍ന്ന് സൊസൈറ്റികള്‍ ഹൈക്കോടതിയെ സമീപിക്കുകയായിരുന്നു. തുടര്‍ന്നായിരുന്നു കോടതി നിര്‍ദേശം.
സ്വകാര്യ ഏജന്‍സിയെ വെച്ച് ഒരുമാസത്തിനകം ആസ്തി മൂല്യ നിര്‍ണയം നടത്തണം. കെ.എസ്.ആര്‍.ടി.സി. ആസ്തികള്‍ വെച്ച് വായ്പ് എടുത്തതിന്റെ വിവരങ്ങളും ലഭ്യമാക്കണം. ആസ്തി എത്ര ബാധ്യത എത്ര എന്ന് വ്യക്തമാക്കുന്ന ബാലന്‍സ് ഷീറ്റ് തന്നെ തയ്യാറാക്കണം എന്നാണ് കോടതി വ്യക്തമാക്കിയിരിക്കുന്നത്.
