തിരുവനന്തപുരം: ലോകമെമ്പാടുമുള്ള മലയാളികള്‍ ഓണത്തെ വരവേല്‍ക്കാനുള്ള തയാറെടുപ്പിലാണ്. അതുകൊണ്ടുതന്നെ ഈ ദിനം ഉത്രാടപ്പാച്ചിലിന്റേതു കൂടിയാണ്. നഗരങ്ങളിലെല്ലാം ആളുകളുടെ തിരക്കാണ്. പച്ചക്കറികളും പഴങ്ങളും പൂക്കളും ഓണക്കോടികളുമെല്ലാം ഒരുക്കുന്നതിനുള്ള അവസാന വട്ട ഓട്ടത്തിലാണ് ആളുകള്‍. നാളെ ഇനി ഈ തിരക്കുകളില്‍ നിന്നെല്ലാം മാറി തിരുവോണത്തിന് കോടിയുടുത്ത് രുചികരമായ വിഭവങ്ങളുമായി മാവേലിയെ വരവേല്‍ക്കും.
വിപണികളില്‍ പച്ചക്കറികളും പൂക്കളും സജീവമാണ്. തുണിക്കടകളില്‍ വലിയ തിരക്കാണ്. പൊതുവെ ഓണമാകുമ്പോള്‍ പച്ചക്കറികള്‍ക്ക് വില കൂടാറുണ്ടെങ്കിലും അത്ര ഞെട്ടിക്കുന്ന വിലയല്ല പച്ചക്കറികള്‍ക്കെന്നാണ് വിപണിയില്‍ നിന്ന് ലഭിക്കുന്ന വിവരം. പുതുതലമുറയുടെ പര്‍ച്ചേസിം?ഗ് ട്രെന്റ് മാറിയതോടെ, തുണിക്കടകള്‍ക്കപ്പുറം ഓണ്‍ലൈന്‍ സൈറ്റുകളും സജീവമായിരിക്കുകയാണ്. നേരത്തെ ബുക്ക് ചെയത വസ്ത്രങ്ങള്‍ വീടുകളിലെത്തിക്കാനുള്ള ഡെലിവറി വാഹനങ്ങളുടെ ഓട്ടപ്പാച്ചിലുമുണ്ട് നിരത്തുകളില്‍.
ഇതിനൊക്കെയിടയില്‍ ദൂരെ ജോലി ചെയ്യുന്ന മലയാളികള്‍ നാട്ടിലെത്താനുള്ള പാച്ചിലിലാണ്. ബസിനും ട്രെയിനിനും ടിക്കറ്റ് കിട്ടാനില്ലാത്തതിന്റെ ബുദ്ധിമുട്ടുകളും റോഡിലെ തിരക്കുകളും മറ്റൊരു കാര്യം. സ്വകാര്യ ബസുകള്‍ സീസണ്‍ അനുസരിച്ച് ടിക്കറ്റ് നിരക്ക് കൂട്ടുന്നതും ആളുകളെ പ്രതിസന്ധിയിലാക്കുന്നുണ്ട്.
