മുംബൈ: നടി ഷെഫാലി ജാരിവാല അന്തരിച്ചു. 42 വയസ്സായിരുന്നു. ഇന്നലെ രാത്രി മുംബൈയിലെ അന്ധേരിയിലെ വീട്ടിൽ ബോധം നഷ്ടപ്പെട്ടനിലയിലാണ് നടിയെ കണ്ടെത്തിയത്.
ഭർത്താവ് പരാഗ് ത്യാഗിയും മറ്റും ചേർന്ന് ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്കു കൈമാറും.
ഹൃദയാഘാതത്തെ തുടർന്നാണ് മരണമെന്നാണ് ആദ്യം പുറത്തുവന്ന വിവരം. പോസ്റ്റ്മോർട്ടത്തിനുശേഷമേ മരണകാരണം എന്തെന്ന് വ്യക്തമാകുകയുള്ളു എന്നും മുംബൈ പൊലീസ് അറിയിച്ചു.
മുംബൈയിലെ ബെല്ലെവ്യൂ ആശുപത്രിയിൽ എത്തിച്ചപ്പോഴേക്കും അവർ മരിച്ചിരുന്നുവെന്ന് ആശുപത്രി വൃത്തങ്ങൾ അറിയിച്ചു. പുലർച്ചെ ഒരുമണിയോടെയാണ് മരണ വിവരം അറിഞ്ഞതെന്ന് മുംബൈ പൊലീസ് അറിയിച്ചു. പൊലീസും ഫൊറൻസിക് സംഘവും വീട്ടിലെത്തി പരിശോധന നടത്തി.
2002ൽ പുറത്തിറങ്ങിയ ‘കാന്ടാ ലഗാ’ എന്ന ഗാനത്തിലൂടെയാണ് ഷെഫാലി പ്രശസ്തിയിലെത്തിയത്. ഈ ഗാനം വലിയ തരംഗമായി മാറി. കാന്ടാ ലഗായിൽ അഭിനയിക്കുന്ന ഷെഫാലിക്ക് 20 വയസ്സായിരുന്നു പ്രായം.
പിന്നീട് നിരവധി റിയാലിറ്റി ഷോകളിലും ഡാൻസ് ഷോകളിലും പങ്കെടുത്ത് അവർ ജനപ്രിയ താരമായി. ഷെഫാലിക്കൊപ്പം പരാഗും നാച്ച് ബലിയെ 5, നാച്ച് ബലിയെ 7 എന്നീ ഡാൻസ് ഷോകളിൽ ഒരുമിച്ചു പങ്കെടുത്തിരുന്നു.
കൂടാതെ ബിഗ് ബോസ് 13ാം സീസണിലും ഷെഫാലി പങ്കെടുത്തിരുന്നു. 2004ൽ ഹർമീത് സിങ്ങിനെ വിവാഹം ചെയ്തെങ്കിലും 2009ൽ ഇരുവരും വേർപിരിഞ്ഞു. തുടർന്നാണ് 2015 ൽ പരാഗ് ത്യാഗിയെ വിവാഹം കഴിച്ചു.
Summary: Popular actress Shefali Jariwala passed away at the age of 42. She was found unconscious at her residence in Andheri, Mumbai, last night. Her sudden demise has left fans and the film industry in shock.
