വിവാദമായ പഞ്ചാബ് നാഷണല് ബാങ്ക് സാമ്പത്തികത്തട്ടിപ്പ് കേസില് പ്രതിയായ ഇന്ത്യന് രത്നവ്യാപാരി മെഹുല് ചോക്സി ബെല്ജിയത്തിൽ അറസ്റ്റിൽ.
സിബിഐയുടെ അപേക്ഷയില് ബെല്ജിയം പോലീസ് ശനിയാഴ്ചയാണ് 65-കാരനായ മെഹുല് ചോക്സിയെ അറസ്റ്റ് ചെയ്തത്. നിലവില് ഇയാള് ജയിലിലാണെന്ന് ഇക്കണോമിക് ടൈംസ് റിപ്പോര്ട്ട് ചെയ്തു.
2018-ലും 2021-ലുമായി മുംബൈ കോടതി പുറപ്പെടുവിച്ച രണ്ട് അറസ്റ്റ് വാറണ്ടുകളുടെ അടിസ്ഥാനത്തിലാണ് ചോക്സിയെ പിടികൂടിയിരിക്കുന്നത്.
പഞ്ചാബ് നാഷണല് ബാങ്കില് നിന്ന് 13,500 കോടി രൂപയുടെ വായ്പ തട്ടിപ്പ് നടത്തിയ കേസില് അന്വേഷണം നേരിടുകയാണ് ഇയാൾ.
ഭാര്യ പ്രീതി ചോക്സിക്കൊപ്പം ബെല്ജിയത്തില് താമസിച്ചു വരുന്നതിനിടെയാണ് അറസ്റ്റ്.
ഇന്ത്യന് അന്വേഷണ ഏജന്സികളുടെ നിര്ദേശ പ്രകാരമാണ് ചോക്സിയെ ബെല്ജിയം പോലീസ് അറസ്റ്റ് ചെയ്തിരിക്കുന്നതെന്നാണ് വിവരം.
