ടിബിലിസി: ജോർജിയയിലെ റിസോർട്ടിൽ കിടപ്പുമുറിയിൽ 12 ഇന്ത്യക്കാരെ മരിച്ചനിലയിൽ കണ്ടെത്തി. റിസോർട്ടിലെ ഇന്ത്യൻ റസ്റ്ററന്റിലെ ജീവനക്കാരാണ് മരിച്ചത്. രണ്ടാം നിലയിലുള്ള കിടപ്പുമുറിയിലാണ് 12 പേരുടെയും മൃതദേഹങ്ങൾ കണ്ടെത്തിയത്.(12 Indians found in resort at Georgia)
വിഷവാതകമായ കാർബൺ മോണോക്സൈഡ് ശ്വസിച്ചാണ് ഇവർ മരിച്ചതെന്ന് പൊലീസിനെ ഉദ്ധരിച്ച് പ്രാദേശിക മാധ്യമങ്ങൾ റിപ്പോർട്ട് ചെയ്തിട്ടുണ്ട്. മൃതദേഹങ്ങൾ കിടന്നിരുന്ന മുറിയുടെ സമീപത്ത് ജനറേറ്റർ കണ്ടെത്തിയെന്ന് ജോർജിയ വാർത്താകുറിപ്പിലൂടെ അറിയിച്ചു. അടച്ചിട്ട മുറിയിൽ പ്രവർത്തിച്ച ജനറേറ്ററിൽ നിന്നുയർന്ന പുക ശ്വസിച്ചായിരിക്കാം ഇവർ മരിച്ചതെന്നാണ് നിഗമനം.
മൃതദേഹങ്ങളിൽ മറ്റു മുറിവുകളോ പരിക്കുകളോ ഇല്ല. മരണകാരണം കൃത്യമായി കണ്ടെത്തുന്നതിനുള്ള ഫൊറൻസിക് പരിശോധനകൾ തുടരുകയാണ്. സംഭവത്തിൽ ക്രിമിനൽ കേസെടുത്തു. മരിച്ചവരുടെ കുടുംബങ്ങളെ ജോർജിയയിലെ ഇന്ത്യൻ എംബസി അനുശോചനം അറിയിച്ചു.
