മീൻപിടിത്ത റീലുകളിലൂടെ ശ്രദ്ധേയനായ വൈറൽ യുട്യൂബർ പിടിയിൽ; വള്ളത്തിൽ നിന്ന് പിടികൂടിയത് 580 ഗ്രാം കഞ്ചാവ്
കോട്ടയം: മീൻപിടിത്ത വീഡിയോകളിലൂടെ സോഷ്യൽ മീഡിയയിൽ ശ്രദ്ധ നേടിയ യുവാവ് കഞ്ചാവുമായി പിടിയിലായി. വള്ളത്തിൽ ഒളിപ്പിച്ച 580 ഗ്രാം കഞ്ചാവാണ് പോലീസ് കണ്ടെത്തിയത്.
സോഷ്യൽ മീഡിയയിൽ മീൻപിടിത്ത വീഡിയോകൾ പങ്കുവച്ച് ശ്രദ്ധ നേടിയ യുവാവ് കഞ്ചാവുമായി പോലീസിന്റെ പിടിയിലായി. കോട്ടയം വെള്ളൂർ വടകര അരിഞ്ഞാമൂഴി സ്വദേശിയായ അഭിജിത്ത് സാബു (29) ആണ് അറസ്റ്റിലായത്.
വെട്ടിക്കാട്ടുമുക്ക് പാലത്തിനുസമീപമുള്ള ആറാട്ടുകടവിൽ ഞായറാഴ്ച രാവിലെ 10 മണിയോടെയായിരുന്നു സംഭവം. ജില്ലാ പോലീസ് മേധാവിക്ക് ലഭിച്ച രഹസ്യവിവരത്തെ തുടർന്ന് ഡൻസാഫ് സംഘവും തലയോലപ്പറമ്പ് പോലീസും ചേർന്ന് നടത്തിയ പരിശോധനയിലാണ് യുവാവ് പിടിയിലായത്.
ചെറിയ വള്ളത്തിൽ യാത്രചെയ്ത് ചൂണ്ടയിട്ട് മീൻപിടിക്കുന്ന വീഡിയോകൾ ചിത്രീകരിച്ച് ഇൻസ്റ്റഗ്രാമിൽ റീലുകളായി പങ്കുവെച്ചാണ് അഭിജിത്ത് ശ്രദ്ധ നേടിയത്. പരിശോധനയ്ക്കിടെ കടവിൽ കെട്ടിയിട്ടിരുന്ന വള്ളത്തിലേക്ക് കയറാനെത്തിയപ്പോഴാണ് ഇയാളെ പോലീസ് കസ്റ്റഡിയിലെടുത്തത്.
വള്ളത്തിൽ ഒളിപ്പിച്ചു വെച്ചിരുന്ന 580 ഗ്രാം കഞ്ചാവാണ് പിടിച്ചെടുത്തത്. യുവതികളടക്കമുള്ള ഉപഭോക്താക്കൾക്ക് വിൽപ്പനയ്ക്കായി സൂക്ഷിച്ചിരുന്നതാണെന്ന് പോലീസ് അറിയിച്ചു.
സോഷ്യൽ മീഡിയയുടെ വ്യാപക ഉപയോഗം നിയമവിരുദ്ധ പ്രവർത്തനങ്ങൾക്ക് മറയാകുന്ന പ്രവണത വർധിക്കുന്നതായി പോലീസ് ചൂണ്ടിക്കാട്ടി. ഇത്തരം സംഭവങ്ങൾ തടയാൻ നിരീക്ഷണം കൂടുതൽ ശക്തമാക്കുമെന്നും അധികൃതർ അറിയിച്ചു.
അഭിജിത്തിനെതിരെ തലയോലപ്പറമ്പ് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
English Summary
A Kerala-based YouTuber known for fishing videos has been arrested with 580 grams of cannabis hidden in his boat. Police acted on a tip-off and seized the contraband near a riverside location in Kottayam. Authorities warned about the misuse of social media as a cover for illegal activities.
