നാഗർകോവിൽ: കന്യാകുമാരിയിൽ സെൽഫിയെടുക്കുന്നതിനിടെ തിരയിൽപ്പെട്ട യുവാവ് മുങ്ങിമരിച്ചു. സേലം മാരിമംഗലം സ്വദേശി വിജയ്(27) ആണ് മരിച്ചത്. കടലിലെ പാറയിൽ നിന്ന് ഫോട്ടോയെടുക്കുന്നതിനിടെയാണ് അപകടമുണ്ടായത്.
ഞായറാഴ്ചയാണ് സംഭവം. മാരിമംഗലത്തുനിന്ന് ബന്ധുക്കളായ 27 പേർ നാഗർകോവിലിൽ നടന്ന ചടങ്ങിൽ പങ്കെടുക്കാൻ എത്തിയിരുന്നു. തുടർന്ന് വൈകുന്നേരത്തോടെ ഇവർ കന്യാകുമാരിയിൽ എത്തി. ഗാന്ധിമണ്ഡപത്തിനു പുറകിൽ കടലിലെ പാറയിൽ കയറി നിന്ന് വിജയ് ഫോണിൽ സെൽഫിയെടുക്കുന്നതിനിടെ തിരയിൽപ്പെട്ട് കടലിൽ വീഴുകയായിരുന്നു.
യുവാവിനായി തീരദേശ പോലീസ് തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് തിങ്കളാഴ്ച ഉച്ചയോടെയാണ് മൃതദേഹം കണ്ടെത്തിയത്. ഞായറാഴ്ച കള്ളക്കടൽ പ്രതിഭാസം ഉണ്ടാകുമെന്ന് മുന്നറിയിപ്പ് ഉണ്ടായിരുന്നതിനാൽ കടലിൽ ഇറങ്ങാൻ വിലക്ക് ഉണ്ടായിരുന്നു. എന്നാൽ പോലീസിന്റെ കണ്ണ് വെട്ടിച്ച് യുവാവ് കടലിൽ ഇറങ്ങുകയായിരുന്നു.
