പാലക്കാട്: കാട്ടുപന്നി ബൈക്കിലിടിച്ചതിനെ തുടർന്നുണ്ടായ അപകടത്തിൽ യുവാവ് മരിച്ചു. മണ്ണാർക്കാട് നഗരസഭ പരിധിയിൽ മുക്കണ്ണത്താണ് അപകടമുണ്ടായത്. കോങ്ങാട് ചെറായ കൊട്ടശ്ശേരി വരപ്പാക്കൽ രതീഷാണ് മരിച്ചത്.(young man died after being hit by a wild boar on his bike)
വെള്ളിയാഴ്ച രാത്രിയാണ് സംഭവം. പരിക്കേറ്റ രതീഷിനെ ആദ്യം വട്ടമ്പലം സ്വകാര്യ ആശുപത്രിയിലും പിന്നീട് പെരിന്തൽമണ്ണയിലും തുടർന്ന് കോഴിക്കോട് മെഡിക്കൽ കോളജിലും പ്രവേശിപ്പിച്ചെങ്കിലും ഇന്ന് പുലർച്ചെ മരണം സംഭവിക്കുകയായിരുന്നു. മൃതദേഹം പോസ്റ്റുമോർട്ടത്തിന് ശേഷം കുടുംബത്തിന് വിട്ടുനൽകും.
അതേസമയം പ്രദേശത്ത് കാട്ടുപന്നികൾ മൂലമുള്ള അപകടങ്ങൾ തുടർക്കഥയാവുകയാണ്. കഴിഞ്ഞ മാസമാണ് കാരാ കുറിശ്ശി സ്വദേശിയായ മുഹമ്മദ് ആഷിഖ് ഇതേ സ്ഥലത്ത് ബൈക്കിൽ കാട്ടുപന്നി ഇടിച്ച് ബൈക്ക് മറിഞ്ഞ് മരിച്ചത്. അധികൃതർ വേണ്ട രീതിയിൽ ഇടപെടുന്നില്ലെന്ന് നാട്ടുകാർ ആരോപിച്ചു.
