ചെന്നൈ അഡയാർ കൊലപാതകം: മാലിന്യക്കൂമ്പാരത്തിൽ നിന്ന് യുവതിയുടെ മൃതദേഹം കണ്ടെത്തി; ഞെട്ടിക്കുന്ന ക്രൂരതയുടെ വിവരങ്ങൾ പുറത്ത്

മാലിന്യക്കൂമ്പാരത്തിൽ നിന്ന് യുവതിയുടെ മൃതദേഹം കണ്ടെത്തി


ചെന്നൈ നഗരത്തെ നടുക്കിയ അഡയാർ കൊലപാതകക്കേസിൽ നിർണ്ണായക വഴിത്തിരിവ്. മൂന്ന് ദിവസമായി തുടരുന്ന തിരച്ചിലിനൊടുവിൽ ബിഹാർ സ്വദേശിനിയായ മുനിത കുമാരിയുടെ മൃതദേഹം പെരുങ്കുടിയിലെ കൂറ്റൻ മാലിന്യസംഭരണ കേന്ദ്രത്തിൽ നിന്നും കണ്ടെടുത്തു.

ബിഹാറിൽ നിന്ന് മെച്ചപ്പെട്ട ജീവിതം സ്വപ്നം കണ്ട് കഴിഞ്ഞ ജനുവരി 21ന് ചെന്നൈയിലെത്തിയ ഗൗരവ് കുമാറും ഭാര്യ മുനിതയും അവരുടെ രണ്ട് വയസ്സുകാരനായ മകനുമാണ് അതിക്രൂരമായി കൊല്ലപ്പെട്ടത്.

ഗൗരവിന്റെയും മകന്റെയും മൃതദേഹങ്ങൾ നേരത്തെ കണ്ടെത്തിയിരുന്നെങ്കിലും മുനിതയുടെ മൃതദേഹം കണ്ടെത്താൻ വൈകിയത് അന്വേഷണ സംഘത്തെ ഏറെ കുഴപ്പിച്ചിരുന്നു.

ഒടുവിൽ ശാസ്ത്രീയമായ പരിശോധനകൾക്കും കഠിനപ്രയത്നത്തിനും ശേഷമാണ് അഞ്ഞൂറിലധികം ലോഡ് മാലിന്യങ്ങൾക്കിടയിൽ നിന്നും മൃതദേഹം പുറത്തെടുത്തത്.

മൃതദേഹം കണ്ടെത്തുക എന്നത് പോലീസിനെ സംബന്ധിച്ചിടത്തോളം വലിയൊരു വെല്ലുവിളിയായിരുന്നു.

പെരുങ്കുടിയിലെ മാലിന്യ പ്ലാന്റിൽ ടൺ കണക്കിന് പുതിയ മാലിന്യങ്ങൾ ദിവസവും വന്നുകൊണ്ടിരിക്കുന്ന സാഹചര്യത്തിൽ കൃത്യമായ സ്ഥലം കണ്ടെത്തുക അസാധ്യമായിരുന്നു.

എന്നാൽ പോലീസും ശുചീകരണ തൊഴിലാളികളും ട്രക്ക് ഡ്രൈവർമാരുമടങ്ങുന്ന എഴുപത്തിയഞ്ചോളം പേരുടെ വലിയൊരു സംഘം മൂന്ന് ദിവസമാണ് വിശ്രമമില്ലാതെ തിരച്ചിൽ നടത്തിയത്.

ജെസിബികളും മറ്റ് യന്ത്രസാമഗ്രികളും ഉപയോഗിച്ച് ഓരോ തട്ടുകളായി മാലിന്യം നീക്കിയാണ് പരിശോധന പൂർത്തിയാക്കിയത്.

മൃതദേഹം കണ്ടെടുത്ത ശേഷം വിദഗ്ധ പരിശോധനകൾക്കായി റോയപ്പേട്ട ഗവൺമെന്റ് ആശുപത്രിയിലേക്ക് മാറ്റി.

സംഭവത്തിൽ ഗൗരവിന്റെ സുഹൃത്തുക്കളായ അഞ്ചംഗ സംഘത്തെ പോലീസ് ഇതിനോടകം അറസ്റ്റ് ചെയ്തിട്ടുണ്ട്.

മനുഷ്യമനസാക്ഷിയെ മരവിപ്പിക്കുന്ന വിവരങ്ങളാണ് പ്രതികളെ ചോദ്യം ചെയ്തതിൽ നിന്നും പോലീസിന് ലഭിച്ചത്.

ഗൗരവിനെ വിശ്വാസത്തിലെടുത്ത് കൂടെക്കൂട്ടിയ സുഹൃത്തുക്കൾ തന്നെയാണ് ഈ ചതിക്ക് പിന്നിൽ പ്രവർത്തിച്ചത്. ഗൗരവിന്റെ ഭാര്യയെ പീഡിപ്പിക്കാനുള്ള പ്രതികളുടെ ശ്രമം അദ്ദേഹം തടഞ്ഞതാണ് കൊലപാതകത്തിലേക്ക് നയിച്ചത്.

പ്രതിരോധിക്കാൻ ശ്രമിച്ച ഗൗരവിനെ സംഘം ചേർന്ന് മർദ്ദിച്ചും ശ്വാസം മുട്ടിച്ചും കൊലപ്പെടുത്തുകയായിരുന്നു. ഇതിന് ശേഷം മുനിതയെ ക്രൂരമായി പീഡിപ്പിക്കുകയും പിന്നീട് ശ്വാസം മുട്ടിച്ച് കൊലപ്പെടുത്തുകയും ചെയ്തു.

മാതാപിതാക്കളുടെ മരണം നേരിട്ട് കണ്ടു കരഞ്ഞ രണ്ട് വയസ്സുകാരനായ പിഞ്ചുബാലനെ പ്രതികൾ തറയിലടിച്ചാണ് കൊലപ്പെടുത്തിയത്.

ഈ ക്രൂരതയ്ക്ക് ശേഷം തെളിവ് നശിപ്പിക്കാനായി മൂന്ന് മൃതദേഹങ്ങളും ചാക്കുകളിലാക്കി നഗരത്തിന്റെ വിവിധ ഭാഗങ്ങളിൽ കൊണ്ടുപോയി തള്ളുകയായിരുന്നു.

അഡയാറിലെ ഒരു അപ്പാർട്ട്മെന്റിന് സമീപം ഉപേക്ഷിക്കപ്പെട്ട നിലയിൽ കണ്ടെത്തിയ ഗൗരവിന്റെ മൃതദേഹമാണ് ഈ ഇരട്ടക്കൊലപാതകത്തിന്റെ ചുരുളഴിച്ചത്.

കേസന്വേഷണത്തിൽ നിർണ്ണായകമായത് സമീപത്തെ സിസിടിവി ദൃശ്യങ്ങളാണ്. രണ്ട് യുവാക്കൾ ബൈക്കിൽ ഒരു വലിയ ചാക്കുമായി വരുന്നത് ദൃശ്യങ്ങളിൽ പതിഞ്ഞിരുന്നു.

ബൈക്കിന്റെ നമ്പർ കേന്ദ്രീകരിച്ച് നടത്തിയ അന്വേഷണം പ്രതികളിലേക്ക് വേഗത്തിൽ എത്തിച്ചേരാൻ പോലീസിനെ സഹായിച്ചു.

പിടിയിലായ പ്രതികളെല്ലാം ബിഹാർ സ്വദേശികളാണെന്ന് തിരിച്ചറിഞ്ഞിട്ടുണ്ട്.

കുടുംബത്തോടൊപ്പം ജോലി തേടിയെത്തിയ ഒരു യുവാവിനും കുടുംബത്തിനും സ്വന്തം നാട്ടുകാരിൽ നിന്ന് തന്നെ ഇത്തരമൊരു ദുർഗതി ഉണ്ടായത് തമിഴ്നാട്ടിലെ ബിഹാർ തൊഴിലാളികൾക്കിടയിലും വലിയ പരിഭ്രാന്തി സൃഷ്ടിച്ചിട്ടുണ്ട്.

കൃത്യമായ ആസൂത്രണത്തോടെ നടത്തിയ ഈ ക്രൂരകൃത്യത്തിൽ കൂടുതൽ പേർക്ക് പങ്കുണ്ടോ എന്ന കാര്യവും പോലീസ് പരിശോധിച്ച് വരികയാണ്.

Chennai Murder Case, Adyar Crime News, Bihar Family Murdered, Perungudi Garbage Dump Search, Chennai Police Investigation, Brutal Murder Malayalam, Migrant Workers Safety.