കോഴിക്കോട്: രാത്രി വീടുകളിൽ നിരന്തരം ആരോ ഒളിഞ്ഞുനോക്കുന്നതായി പരാതി ഉയർന്നതോടെ തിരച്ചിലിനു വാട്സാപ് ഗ്രൂപ്പ് രൂപീകരിച്ച് നാട്ടുകാർ. ഒടുവിൽ സിസിടിവിയിൽ കുടുങ്ങിയ ആളെ കണ്ടപ്പോൾ നാട്ടുകാർ തന്നെ ഞെട്ടിപ്പോയി. വാട്സാപ് ഗ്രൂപ്പിന്റെ അഡ്മിൻ തന്നെയായിരുന്നു ആ ഒളിഞ്ഞു നോട്ടക്കാരൻ.(WhatsApp group admin caught on CCTV camera)
സംഭവത്തിൽ ആർക്കും പരാതിയില്ലാത്തതിനാൽ പൊലീസ് കേസെടുത്തിട്ടില്ല. കോഴിക്കോട് കൊരങ്ങാടാണ് ഇത്തരമൊരു അനുഭവം ഉണ്ടായത്. രാത്രി എത്തുന്നയാൾ വീടുകളുടെ മതിൽ ചാടിക്കടന്ന് കിടപ്പു മുറിയിൽ ഒളിഞ്ഞു നോക്കും. ശല്യം സഹിക്കാനാകാതെ വന്നതോടെയാണ് പ്രദേശവാസികൾ സംഘടിച്ച് തിരച്ചിൽ ആരംഭിച്ചത്. തിരച്ചിൽ ഏകോപിപ്പിക്കുന്നതിന് വാട്സാപ് ഗ്രൂപ്പും രൂപീകരിച്ചു. രാത്രി സമയത്ത് ചിലർ കാവലിരിക്കുകയും ചെയ്തു. എന്നാൽ ആളെ കുറിച്ച് വിവരമൊന്നും ലഭിച്ചില്ല.
എന്നാൽ സിസി ടിവിയിൽ ഒളിഞ്ഞു നോട്ടക്കാരന്റെ ദൃശ്യം പതിയുകയായിരുന്നു. ഗ്രൂപ്പ് വഴി നടക്കുന്ന ചർച്ചകൾ മനസിലാക്കിയാണ് ഇയാൾ ഓരോ വീടുകളിൽ കയറി ഒളിഞ്ഞു നോക്കിയിരുന്നത്. എന്നാൽ തിരച്ചിൽ സ്ഥലം മനസ്സിലാക്കിയെങ്കിലും വീട്ടിൽ സിസിടിവിയുള്ളത് ഇയാൾ അറിഞ്ഞിരുന്നില്ല.
