വയനാട് തുരങ്കപാത നിര്‍മ്മാണോദ്ഘാടനം
തിരുവനന്തപുരം: വയനാടിന്റെ യാത്രാപ്രശ്നങ്ങൾക്ക് ശാശ്വത പരിഹാരമെന്ന നിലയിൽ ഏറെ കാലമായി കാത്തിരുന്ന ആനക്കാംപൊയിൽ-കള്ളാടി-മേപ്പാടി ടണൽ റോഡ് പദ്ധതി യാഥാർത്ഥ്യമാകുന്നു.
ആനക്കാംപൊയില്‍ – കള്ളാടി – മേപ്പാടി തുരങ്കപാതയുടെ നിര്‍മാണ പ്രവൃത്തികള്‍ക്ക് ഇന്ന് തുടക്കമാകും.
വൈകിട്ട് നാലിന് ആനക്കാംപൊയില്‍ സെന്റ് മേരീസ് സ്‌കൂളില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ പദ്ധതിയുടെ നിര്‍മ്മാണ പ്രവര്‍ത്തനോദ്ഘാടനം നിര്‍വഹിക്കും.
2134 കോടി രൂപ ചെലവിൽ നിർമ്മിക്കുന്ന തുരങ്കപാതയ്ക്ക് പാരിസ്ഥിതിക അനുമതി ലഭിച്ചതോടെ, ഉടൻ തന്നെ നിർമാണപ്രവർത്തനങ്ങൾ ആരംഭിക്കുമെന്ന് സർക്കാർ അറിയിച്ചു.
പദ്ധതിയുടെ പ്രധാന വിവരങ്ങൾ
ആകെ ചെലവ്: 2134 കോടി രൂപ
പാതയുടെ നീളം: 8.73 കിലോമീറ്റർ
ടണൽ ഭാഗം: 8.1 കിലോമീറ്റർ ഇരട്ട ടണലുകൾ
നിർവഹണ ഏജൻസി: കൊങ്കൺ റെയിൽവേ കോർപ്പറേഷൻ ലിമിറ്റഡ്
ഭൂമി ഏറ്റെടുക്കൽ: കോഴിക്കോട്, വയനാട് ജില്ലകളിലായി 33 ഹെക്ടർ. ഇതിൽ 90% സ്വകാര്യഭൂമി ഏറ്റെടുത്തിട്ടുണ്ട്. വനഭൂമി നേരത്തേ കൈമാറിയിരുന്നു.
കിഫ്ബിയാണ് (KIIFB) പദ്ധതിക്ക് ധനസഹായം നൽകുന്നത്. ടണൽ നിർമാണം, അപ്രോച്ച് റോഡ്, പാലങ്ങൾ തുടങ്ങിയവ രണ്ട് പാക്കേജുകളായി പൂർത്തിയാക്കും.
ആധുനിക സൗകര്യങ്ങളോടെയുള്ള പാത
നാലുവരി ഗതാഗതത്തിനായി രൂപകൽപ്പന ചെയ്തിരിക്കുന്ന ഈ തുരങ്കപാതയിൽ യാത്രക്കാരുടെ സുരക്ഷ ഉറപ്പാക്കാൻ വെന്റിലേഷൻ സംവിധാനം, അഗ്നിശമന സംവിധാനം, എമർജൻസി കോൾ സംവിധാനം, സിസിടിവി നിരീക്ഷണം തുടങ്ങി ആധുനിക സൗകര്യങ്ങൾ ഒരുക്കും.
ഗതാഗത സൗകര്യങ്ങളിൽ വിപ്ലവം
ടണൽ റോഡ് പൂർത്തിയാകുമ്പോൾ, ആനക്കാംപൊയിൽ മുതൽ മേപ്പാടി വരെ യാത്രാസമയം ഗണ്യമായി കുറയും. നിലവിൽ വയനാട് ചുരത്തിലൂടെ മണിക്കൂറുകളോളം ചെലവഴിക്കേണ്ടി വരുന്ന യാത്രകൾ, വളരെ കുറച്ച് സമയത്തിനുള്ളിൽ പൂർത്തിയാക്കാൻ കഴിയും.
കൂടാതെ, കേരളത്തിൽ നിന്ന് കർണാടക, തമിഴ്നാട് എന്നിവിടങ്ങളിലേക്കുള്ള യാത്രകളും എളുപ്പമാകും. വാണിജ്യ, വിനോദസഞ്ചാര മേഖലകൾക്കും വയനാടൻ മലയോര മേഖലയിലെ സമഗ്ര വികസനത്തിനും പദ്ധതി വലിയൊരു സഹായകമാകുമെന്ന് മുഖ്യമന്ത്രി അറിയിച്ചു.
രാഷ്ട്രീയ-പ്രശ്നങ്ങൾ മറികടന്ന് മുന്നോട്ട്
മുൻ സർക്കാരിന്റെ നൂറുദിന കർമ്മപരിപാടിയിൽ ഉൾപ്പെടുത്തി ആരംഭിച്ച പദ്ധതിയാണ് ഇത്. പരിസ്ഥിതി അനുമതികൾ ഉൾപ്പെടെ നിരവധി തടസ്സങ്ങൾ മറികടന്നാണ് ഇപ്പോഴത്തെ വിജയം കൈവരിച്ചത്.
പ്രതീക്ഷകൾ
വയനാട് ചുരത്തിൽ സ്ഥിരമായി ഉണ്ടാകുന്ന ഗതാഗത തടസ്സം, അപകടങ്ങൾ, പ്രകൃതി ദുരന്തങ്ങൾ തുടങ്ങിയവ കാരണം ഏറെ വർഷങ്ങളായി ജനങ്ങൾ മാറ്റു മാർഗത്തിനായി കാത്തിരുന്നു. ടണൽ റോഡ് പദ്ധതി പൂർത്തിയായാൽ, ഗതാഗതം സുരക്ഷിതവും വേഗത്തിലും പരിസ്ഥിതി സൗഹൃദപരവുമായ രീതിയിൽ നടക്കും എന്ന പ്രതീക്ഷയിലാണ് ജനങ്ങൾ.
കോഴിക്കോട്-വയനാട് നാലുവരി തുരങ്ക പാതക്ക് കേന്ദ്ര പരിസ്ഥിതി മന്ത്രാലയത്തിനു കീഴിലെ വിദഗ്ധ സമിതി അനുമതി നൽകി.
നേരത്തെ പാരിസ്ഥിതിക ആശങ്കകൾ ചൂണ്ടിക്കാട്ടി കേന്ദ്രം ഈ പദ്ധതിയിൽ എതിർപ്പ് പ്രകടിപ്പിച്ചിരുന്നെങ്കിലും ഇപ്പോൾ അനുമതി ലഭിച്ചതോടെ നിർമാണ പ്രവർത്തനത്തിനുള്ള ടെണ്ടർ നടപടികളുമായി സംസ്ഥാന സർക്കാറിന് മുന്നോട്ടുപോകാം. ഔദ്യോഗിക വിജ്ഞാപനം ഉടൻ പുറത്തിറങ്ങുമെന്നാണ് വിവരം.
ഈ മാസം 14, 15 തീയതികളിൽ നടന്ന വിദഗ്ധ സമിതി യോഗത്തിലാണ് തീരുമാനം. ആനക്കാംപൊയിൽ-കള്ളാടി-മേപ്പാടി തുരങ്ക പാതയുടെ പ്രവൃത്തി വ്യവസ്ഥകൾ പാലിച്ചുകൊണ്ട് നടപ്പിലാക്കാനുള്ള ശിപാർശ നൽകിയത്.
പരിസ്ഥിതിയുമായി ബന്ധപ്പെട്ട സംസ്ഥാന വിദഗ്ധസമിതി കഴിഞ്ഞ മാർച്ചിൽ പദ്ധതിക്ക് അനുമതി നൽകിയിരുന്നു.
ഈ നിർദേശങ്ങൾ അന്തിമമായി അംഗീകരിക്കേണ്ട സംസ്ഥാന പരിസ്ഥി ആഘാത വിലയിരുത്തൽ അതോറിറ്റി അംഗങ്ങളുടെ കാലാവധി അവസാനിച്ചതോടെയാണ് കേന്ദ്ര വിദഗ്ധസമിതിയുടെ പരിഗണനക്കുവിട്ടത്.
60 ഉപാധികളോടെയാണ് കേന്ദ്ര പരിസ്ഥിതി മന്ത്രാലയത്തിലെ വിദഗ്ധ സമിതി ഇപ്പോൾ അന്തിമ പാരിസ്ഥിതികാനുമതി നൽകിയത്.
തുരങ്കപാതയുടെ നിർമാണത്തിന്റെ ഖനനസമയത്ത് ഉണ്ടാവാൻ സാധ്യതയുള്ള സ്ഫോടനതിന്റെ പ്രത്യാഘാതങ്ങൾ കുറക്കാൻ സി.എസ്‌.ഐ.ആർ, സി.ഐ.എം.എഫ്.ആർ എന്നിവ നൽകിയിട്ടുള്ള മുഴുവൻ നിർദേശങ്ങളും പാലിക്കാൻ പദ്ധതി നടത്തിപ്പുകാർ ശ്രദ്ധിക്കണം.
വൈബ്രേഷൻ, പ്രളയം, ഭൂമിശാസ്ത്രപരമായ പഠനങ്ങൾ എന്നിവയിലുള്ള നിർദേശങ്ങളും പാലിക്കണം.
ഇവയുമായി ബന്ധപ്പെട്ട റിപ്പോർട്ട് ആറു മാസത്തിൽ ഒരിക്കൽ പരിസ്ഥിതി മന്ത്രാലയത്തിന് കൈമാറണമെന്നും നിർദേശമുണ്ട്. നാല് ഗ്രൗണ്ട് വൈബ്രേഷൻ മോണിറ്ററിങ് സ്റ്റേഷനുകൾ നിർമിക്കണം.
നിർമാണ ജോലിക്കിടെ മണ്ണിടിച്ചിലോ വെള്ളപ്പൊക്കമോ മൂലമുണ്ടാകുന്ന അപകടങ്ങൾ കുറക്കുന്നതിനായുള്ള പ്രത്യേക സംവിധാനങ്ങൾ ഒരുക്കണം.
പശ്ചിമമഘട്ട മലനിരകളിലൂടെ കടന്നു പോകുന്ന പാത ജൈവവൈവിധ്യ സമ്പന്നമാണ്. സംരക്ഷണ പട്ടികയിലുള്ള ബാണാസുര ചിലപ്പൻ അടക്കമുള്ള പക്ഷികളുടെയും വന്യമൃഗങ്ങളുടെയും സംരക്ഷണത്തിനാവശ്യമായ കാര്യങ്ങളും ഇതോടൊപ്പം ചെയ്യണം.
അപ്പൻകാപ്പ് ആന ഇടനാഴിയുടെ സംരക്ഷണം, നിർദ്ധിഷ്ട പദ്ധതി പരിസ്ഥിതിലോല മേഖലയിൽ ഉൾപ്പെടുന്നതിനാൽ സ്ഥിരമായ നിരീക്ഷണം,
കലക്ടർ ശിപാർശ ചെയ്യുന്ന നാലുപേർ അടങ്ങുന്ന വിദഗ്ദസമിതി രൂപവത്കരിക്കുക, നിർമാണത്തിൽ ഏർപ്പെടുന്നവർക്ക് മതിയായ സുരക്ഷ ഒരുക്കുക,
ഇരുവഴിഞ്ഞി പുഴയുടെ സ്വാഭാവിക ഒഴുക്ക് തടയാത്ത രീതിയിൽ നിർമാണം നടത്തുക, ടണലിന്റെ ഉള്ളിലെ വായുവിന്റെ ഗുണനിലവാരം തുടർച്ചയായി നിരീക്ഷിക്കുക തുടങ്ങിയ നിബന്ധനകളും ഇതോടൊപ്പം നൽകിയിട്ടുണ്ട്.
English Summary:
Kerala’s long-awaited Anakkampoyil–Kalladi–Meppadi tunnel road gets environmental clearance. The 2134-crore project with 8.1 km twin tunnels will ease travel to Wayanad, boosting connectivity to Karnataka and Tamil Nadu.
wayanad-tunnel-road-project-2025
Wayanad, Kerala, Tunnel Road, Anakkampoyil, Kalladi, Meppadi, KIIFB, Konkan Railway, Infrastructure, Kerala Development, Travel, Connectivity
