ഭാഗ്യം വന്നത് കോടികളുടെ രൂപത്തിൽ, പക്ഷേ റീത്ത തിരഞ്ഞെടുത്തത് സത്യസന്ധതയുടെ വഴി

ഭാഗ്യം വന്നത് കോടികളുടെ രൂപത്തിൽ, പക്ഷേ റീത്ത തിരഞ്ഞെടുത്തത് സത്യസന്ധതയുടെ വഴി

ഉത്തർപ്രദേശ്: മെയിൻപുരി ജില്ലയിൽ ബാങ്ക് പിഴവിനെ തുടർന്ന് യുവതിയുടെ അക്കൗണ്ടിൽ 10 കോടി രൂപ എത്തിയ സംഭവം ശ്രദ്ധേയമായി. ബിച്വാൻ പ്രദേശത്തെ ദേവ്ഗഞ്ച് ഗ്രാമവാസിയായ റീത്തയുടെ അക്കൗണ്ടിലേക്കാണ് വൻതുക എത്തിയത്.

കൃഷി ചെയ്ത് ഉപജീവനം നടത്തുന്ന റീത്ത പണം പിൻവലിക്കാനായി ബാങ്കിലെത്തിയപ്പോൾ ശാഖ അടച്ചിരുന്നതിനെ തുടർന്ന് എടിഎമ്മിൽ ബാലൻസ് പരിശോധിച്ചു. അപ്പോഴാണ് അക്കൗണ്ടിൽ കോടികൾ ഉള്ളതായി മനസ്സിലായത്. പിന്നീട് മറ്റൊരു എടിഎമ്മിലും പരിശോധിച്ചതോടെ വിവരം ശരിവച്ചു.

സംഭവത്തിൽ ഞെട്ടിയ റീത്തയും കുടുംബവും ഉടൻ തന്നെ ബാങ്ക് അധികൃതരെ വിവരം അറിയിക്കാൻ ശ്രമിച്ചു. അടുത്ത ദിവസം ശാഖയിലെത്തിയെങ്കിലും അവധി ആയതിനാൽ പിന്നീട് ഫോൺ വഴി ബാങ്കുമായി ബന്ധപ്പെട്ടു വിവരം അറിയിച്ചു.

സംഭവത്തിന് സാങ്കേതിക പിഴവോ ഇടപാട് പിഴവോ കാരണമാകാമെന്നാണ് ബാങ്ക് അധികൃതർ വ്യക്തമാക്കുന്നത്. ശാഖ വീണ്ടും തുറന്നതിന് ശേഷം വിശദമായ അന്വേഷണം നടത്തുമെന്നും അറിയിച്ചു.

ഇതിനിടെ, അക്കൗണ്ട് ബാലൻസ് പരിശോധിക്കുന്ന റീത്തയുടെ വീഡിയോ സമൂഹമാധ്യമങ്ങളിൽ വൈറലായി. വൻതുക അക്കൗണ്ടിൽ എത്തിയിട്ടും ദുരുപയോഗം ചെയ്യാതെ അത് തിരികെ നൽകാൻ തയ്യാറായ റീത്തയുടെയും കുടുംബത്തിന്റെയും സത്യസന്ധത സോഷ്യൽ മീഡിയയിൽ പ്രശംസ നേടുകയാണ്.

English Summary
A woman in Uttar Pradesh found ₹10 crore mistakenly credited to her bank account due to a banking error. Instead of misusing it, she informed the bank authorities. Her honesty has been widely praised on social media.