ട്വന്റി 20യ്ക്ക് തിരിച്ചടി; ലക്ഷ്മിപ്രിയയ്ക്ക് പിന്നാലെ വീണാ നായർക്കും വോട്ടില്ല
കൊച്ചി: ട്വന്റി 20 പ്രഖ്യാപിച്ച സെലിബ്രിറ്റി സ്ഥാനാർഥികൾക്ക് തിരിച്ചടിയായി വോട്ടർപട്ടികയിൽ പേര് ഇല്ലാത്തത് വിവാദമാകുന്നു. നടി ലക്ഷ്മിപ്രിയയ്ക്ക് പിന്നാലെ ഏറ്റുമാനൂർ മണ്ഡലത്തിലെ സ്ഥാനാർഥിയായ വീണാ നായർക്കും വോട്ടർപട്ടികയിൽ പേര് ഇല്ലെന്ന് കണ്ടെത്തി.
ഇതിനാൽ വീണാ നായരുടെ സ്ഥാനാർഥിത്വത്തിന് പകരം പുതിയ സ്ഥാനാർഥിയെ കണ്ടെത്താനുള്ള ശ്രമത്തിലാണ് ട്വന്റി 20 നേതൃത്വം.
പെരുമ്പാവൂർ മണ്ഡലത്തിൽ മത്സരിക്കാൻ പ്രഖ്യാപിച്ചിരുന്ന ലക്ഷ്മിപ്രിയയ്ക്കും വോട്ടർപട്ടികയിൽ പേര് ഇല്ലെന്ന വിവരം നേരത്തെ പുറത്തുവന്നിരുന്നു. ഇതിന് പിന്നാലെ മറ്റൊരു സ്ഥാനാർഥിക്കും സമാന പ്രശ്നം ഉണ്ടായത് പാർട്ടിക്ക് തിരിച്ചടിയായി.
കഴിഞ്ഞ ദിവസം ലക്ഷ്മിപ്രിയയുടെ വോട്ടർപട്ടിക പ്രശ്നം പുറത്തുവന്നതോടെ പെരുമ്പാവൂരിൽ നിശ്ചയിച്ചിരുന്ന റോഡ് ഷോ അവസാന നിമിഷം റദ്ദാക്കിയിരുന്നു. കേന്ദ്രമന്ത്രി ഭൂപതി രാജു ശ്രീനിവാസ വർമ വേദിയിലെത്തിയപ്പോഴാണ് സ്ഥാനാർഥിയുടെ പേര് പട്ടികയിൽ ഇല്ലെന്ന വിവരം വ്യക്തമായത്.
തുടർന്ന് സ്ഥാനാർഥിയുടെ അഭാവത്തിൽ റോഡ് ഷോയ്ക്ക് പകരം പദയാത്ര നടത്തി പ്രചാരണ പരിപാടി അവസാനിപ്പിക്കുകയായിരുന്നു.
സീരിയൽ താരങ്ങളെയും റിയാലിറ്റി ഷോ താരങ്ങളെയും രംഗത്തിറക്കി മണ്ഡലം പിടിക്കാനുള്ള ട്വന്റി 20യുടെ നീക്കത്തിന് ഇതോടെ തിരിച്ചടിയുണ്ടായിരിക്കുകയാണ്.
