ഡൊണാൾഡ് ട്രംപിന്റെ മുൻ സുരക്ഷാ ഉപദേഷ്ടാവിന്റെ മെസേജിങ് ആപ്പ് ഹാക്ക് ചെയ്യപ്പെട്ടു. മൈക്ക് വാൾട്ട്സ് ഉപയോഗിച്ചിരുന്ന ആപ്പ് ആണ് ഹാക്ക് ചെയ്തത്. സിഗ്നൽ എന്ന മെസേജിങ് ആപ്പിന്റെ പകർപ്പായ ടെലിമെസേജ് ആണ് മൈക്ക് വാൾട്ട്സ് ഉപയോഗിച്ചിരുന്നത്.
ആർക്കൈവിങ് സൗകര്യം കൂടി അധികമായുണ്ടായിരുന്ന ഈ ആപ്പ് യുഎസ് സർക്കാർ ഉദ്യോഗസ്ഥരും ഏജൻസികളും വ്യാപകമായി ഉപയോഗപ്പെടുത്തിയിരുന്നുവെന്നാണ് റിപ്പോർട്ടുകൾ. ഇതിനാല്‍ രഹസ്യ വിവരങ്ങൾ ചോർന്നേക്കാമെന്നുമാണ് പുറത്തുവരുന്ന വിവരം.
അതേസമയം വാൾട്ട്സും കാബിനറ്റ് ഉദ്യോഗസ്ഥരും തമ്മിൽ അയച്ച സന്ദേശങ്ങൾ ഹാക്കർക്ക് ലഭിച്ചിട്ടില്ല എന്നുമാണ് പുറത്തുവരുന്ന റിപ്പോർട്ട്. എന്നാൽ ആപ്പിൽ ആർക്കൈവ് ചെയ്യപ്പെട്ട കസ്റ്റംസ്, അതിർത്തി സംരക്ഷണം ഉൾപ്പെടെയുള്ള ഏജൻസികളുമായും കോയിൻ ബേസ് പോലുള്ള സ്വകാര്യ സ്ഥാപനങ്ങളുമായും ബന്ധപ്പെട്ട വിവരങ്ങളുടെ സുരക്ഷയിൽ വീഴ്ച സംഭവിച്ചിട്ടുണ്ട്.
യൂസർനെയിമുകൾ, പാസ്‌വേഡുകൾ, ചാറ്റ് ഉള്ളടക്കങ്ങളുടെ സ്നിപ്പെറ്റുകൾ എന്നിവ ഹാക്കർക്ക് ലഭിച്ചിട്ടുണ്ടെന്ന് 404 മീഡിയ റിപ്പോർട്ട് ചെയ്തിട്ടുണ്ട്.
