തൃശൂർ: ചരിത്ര പ്രസിദ്ധമായ ​ഗുരുവായൂർ ഏകാദശി ഇന്ന്. ഭക്തർ വ്രതാനുഷ്ഠാനത്തോടെയായിരിക്കും ഇന്ന് ഗുരുവായൂരപ്പനെ ദർശിക്കാനെത്തുക.

ദശമി ദിനമായ ഇന്നലെ പുലർച്ചെ തുറന്ന നട ഇനി ദ്വാദശി ദിനമായ നാളെ രാവിലെ 9 മണിക്കാണ് അടയ്ക്കുക. പൂജകൾക്ക് മാത്രമായിരിക്കും ഇന്നത്തെ ദിവസം നട അടയ്ക്കുക.

ഏകാദശികളിൽ ഏറ്റവും പ്രധാനമാണ് ​ഗുരുവായൂർ ഏകദാശി. വൃശ്ചിക മാസത്തിലെ ഏകാദശി ദിവസമാണ് ​ഗുരുവായൂരപ്പന്റെ പ്രതിഷ്ഠ നടത്തിയത്.

അതിനാൽ തന്നെ ​ഗുരുവായൂർ ഏകാദശി ​ഗുരുവായൂർ പ്രതിഷ്ഠാ ദിനമായും കണക്കാക്കുന്നു. ശ്രീകൃഷ്ണൻ ​ഗീതോപദേശം നൽകിയ ദിനം കൂടിയാണിത്.

ഭ​ഗവാൻ മഹാവിഷ്ണു ദേവീദേവൻമാർക്കൊപ്പം ​ഗുരുവായൂർക്കെഴുന്നള്ളുന്ന ദിനമാണിതെന്നും വിശ്വാസങ്ങളുണ്ട്. ഇന്നേ ദിവസം ക്ഷേത്രത്തിലെത്തി ദർശനം നടത്തുന്നതു പോലും സുകൃതമാണെന്നു ഭക്തർ വിശ്വസിക്കുന്നു.