ട്രംപ് ചുമത്തിയ താരിഫുകള്‍ നിയമവിരുദ്ധം
വാഷിംഗ്ടണ്‍: ട്രംപ് ഭരണകൂടം ചുമത്തിയ താരിഫുകള്‍ നിയമവിരുദ്ധമെന്ന് യുഎസ് അപ്പീല്‍ കോടതി. താരിഫ് ചുമത്താന്‍ പ്രസിഡന്റ് ട്രംപിന് നിയമപരമായി അധികാരമില്ലെന്നും കോടതി ചൂണ്ടിക്കാട്ടി.
ട്രംപിന്റെ നടപടി യുഎസ് ഭരണഘടനാ ലംഘനമാണെന്നു അന്താരാഷ്ട്ര വ്യാപാര കോടതി നേരത്തേ വിധിച്ചിരുന്നു. ട്രംപ് അധികാരം മറികടന്നെന്നും കോടതി വിലയിരുത്തിരുന്നു. ഇതിനെതിരെയാണ് ഭരണകൂടം അപ്പീല്‍ കോടതിയെ സമീപിച്ചത്.
എന്നാല്‍ അന്താരാഷ്ട്ര വ്യാപാര കോടതിയുടെ വിധി അപ്പീല്‍ കോടതിയും ശരിവെയ്ക്കുകയായിരുന്നു. അപ്പീല്‍ നല്‍കുന്നതിനായി ഭരണകൂടത്തിന് കോടതി സമയം അനുവദിച്ചിട്ടുണ്ട്. ഒക്ടോബര്‍ പതിനാല് വരെ വിധി പ്രാബല്യത്തിൽ വരില്ല.
അതേസമയം ഡൊണാൾഡ് അപ്പീല്‍ കോടതി വിധിക്കെതിരെ ട്രംപ് രംഗത്തെത്തി. വിധി അംഗീകരിക്കാന്‍ കഴിയില്ലെന്ന് ട്രംപ് പറഞ്ഞു. വിധി അംഗീകരിക്കുന്നത് അമേരിക്കയെ ദുരന്തത്തിലേയ്ക്ക് തള്ളിവിടുന്നതിന് തുല്യമാകും എന്നും ട്രംപ് വ്യക്തമാക്കി.
താരിഫുമായി മുന്നോട്ടുപോകും. അപ്പീല്‍ കോടതി വിധിക്കെതിരെ സുപ്രീംകോടതിയെ സമീപിക്കും. താരിഫ് പോരാട്ടത്തില്‍ വിജയിക്കുമെന്നും ട്രംപ് ട്രൂത്ത് സോഷ്യലില്‍ കുറിച്ചു.
ട്രംപ് ഇടഞ്ഞതോടെ പ്രതിസന്ധിയിലായവരിൽ മലയാളികളും
കൊച്ചി: അമേരിക്ക ഇന്ത്യയിൽ നിന്നുള്ള സമുദ്രോത്പന്നങ്ങൾക്ക് ഏർപ്പെടുത്തിയ അധിക തീരുവ കേരളത്തിലെ കയറ്റുമതി മേഖലയിൽ വലിയ പ്രതിസന്ധി സൃഷ്ടിച്ചിരിക്കുകയാണ്.
50 ശതമാനമായി ഉയർത്തിയ തീരുവ നടപ്പിലാക്കിയതോടെ, അമേരിക്കൻ വിപണിയിൽ നിന്ന് കേരളത്തിന്റെ സമുദ്രോത്പന്നങ്ങൾക്ക് ലഭിച്ചിരുന്ന വൻഓർഡറുകൾ മരവിപ്പിക്കപ്പെട്ടു.
ഇതിനാൽ കോടിക്കണക്കിന് രൂപയുടെ ചരക്കുകൾ സംസ്ഥാനത്തെ കമ്പനികളുടെ ഗോഡൗണുകളിൽ കുടുങ്ങിക്കിടക്കുകയാണ്.
കേരളത്തിൽ നിന്ന് അമേരിക്കയിലേക്കുള്ള കയറ്റുമതി ഏറെക്കാലമായി വലിയൊരു വിപണി ആയിരുന്നു. ആറുമാസം മുമ്പ് തന്നെ അമേരിക്കൻ ഇറക്കുമതി സ്ഥാപനങ്ങൾ കേരളത്തിലെ കമ്പനികൾക്ക് വലിയ തോതിൽ ഓർഡറുകൾ നൽകിയിരുന്നു.
അതിന്റെ അടിസ്ഥാനത്തിലാണ് കോടികൾ ചെലവഴിച്ച് സമുദ്രോത്പന്നങ്ങൾ — പ്രത്യേകിച്ച് ചെമ്മീൻ — ശേഖരിച്ചത്.
എന്നാൽ പുതിയ തീരുവ നിലവിൽ വന്നതോടെ അമേരിക്കയിലെ ഇറക്കുമതി സ്ഥാപനങ്ങൾ നിലപാട് മാറ്റി.ഇപ്പോൾ അവർ താത്കാലികമായി ഇറക്കുമതി വേണ്ടെന്ന നിലപാടാണ് സ്വീകരിച്ചിരിക്കുന്നത്.
സമുദ്രോത്പന്ന കയറ്റുമതിക്കാരുടെ കണക്കുപ്രകാരം, അമേരിക്കയിലേക്കു മാത്രം പ്രതിവർഷം ഏകദേശം 21,000 കോടിയോളം രൂപയുടെ സമുദ്രോത്പന്നങ്ങളാണ് കേരളം കയറ്റുമതി ചെയ്യാറുള്ളത്.
എന്നാൽ, ഇത്തവണ ഇതിന്റെ പത്തു ശതമാനത്തിൽ താഴെ മാത്രമാണ് ഇതുവരെ അയയ്ക്കാനായത്. ശേഷിക്കുന്ന ചരക്കുകൾ ഗോഡൗണുകളിൽ കെട്ടിക്കിടക്കുകയാണ്.
Summary: The US Court of Appeals has ruled that the tariffs imposed by the Trump administration were unlawful, stating that former President Donald Trump did not have the legal authority to impose them.
