തിരുവനന്തപുരം :കുടുംബ പ്രേക്ഷകരെ ആകർഷിച്ച സൂര്യകാന്തി എന്ന സീരിയലിലെ നടി ഡോക്ടർ പ്രിയയാണ് അപ്രതീക്ഷിതമായി വിട പറഞ്ഞത് . എട്ടു മാസം ഗർഭിണിയായിരുന്ന അവർ ചികിത്സക്കായി ആശുപത്രിയിൽ എത്തിയപ്പോഴാണ് മരണപ്പെട്ടത് . പക്ഷെ കുഞ്ഞിനെ രക്ഷപ്പെടുത്തി . കുഞ്ഞിപ്പോൾ തീവ്ര പരിചരണ വിഭാഗത്തിലാണ് . നിരവധി സീരിയലുകളിലും , ആൽബങ്ങളിലും ശ്രദ്ധ നേടിയ പ്രിയ പഠന ആവശ്യങ്ങൾക്കായി അഭിനയത്തിൽ നിന്നും താത്കാലികമായി ഇടവേള എടുത്തിരുന്നു ,മരണ വിവരം അറിഞ്ഞു നിരവധി പേർ തിരുവനന്തപുരത്തെ ആശുപത്രിയിലേക്ക് എത്തുകയാണ് . ഇന്ന് രാവിലെ നടൻ കിഷോർസത്യയാണ് മരണവിവരം ഫേസ്ബുക്കിലൂടെ എല്ലാവരെയും അറിയിച്ചത് .
തിരുവന്തപുരത്തു നിന്നും ഇത് മൂന്നാമത്തെ അപ്രതീക്ഷിത നഷ്ടമാണ് സീരിയൽ മേഖലക്ക് ഉണ്ടായത്. ഈ കഴിഞ്ഞ ഓഗസ്റ്റ് 31ന് നടി അപർണനായരെ തിരുവന്തപുരത്തെ സ്വവസതിയിൽ മരിച്ചനിലയിൽ കണ്ടെത്തുകയായിരുന്നു . രണ്ടു മാസത്തിനു ശേഷം ഒക്ടോബർ 30 ന്
നടി രഞ്ജുഷമേനോൻ തിരുവന്തപുരത്തെ ശ്രീകാര്യത്തെ വസതിയിൽ മരണപെട്ടു . രണ്ടു ദിവസത്തിന് ശേഷം വീണ്ടുമൊരു മരണം കൂടി സീരിയൽ മേഖലയ്ക്ക് ഉണ്ടായിരിക്കുന്നു . നടി പ്രിയയുടെ വിടവാങ്ങൽ നിരവധി സീരിയലുകളിൽ ഒപ്പം അഭിനയിച്ച കിഷോർ സത്യയാണ് അറിയിച്ചത് .
കിഷോറിന്റെ പോസ്റ്റ് ഇങ്ങനെ
മലയാള ടെലിവിഷൻ മേഖലയിൽ നൊമ്പരപ്പെടുത്തുന്ന ഒരു അപ്രതീക്ഷിത മരണം കൂടി. ഡോ. പ്രിയ ഇന്നലെ ഹൃദയസ്തംഭനം മൂലം മരിച്ചു. 8 മാസം ഗർഭിണി ആയിരുന്നു. കുഞ്ഞ് ഐസിയുവിലാണ്. മറ്റ് ആരോഗ്യ പ്രശ്‌നങ്ങൾ ഒന്നുമില്ലായിരുന്നു. ഇന്നലെ പതിവ് പരിശോധനകൾക്ക് ആശുപത്രിയിൽ പോയതാണ്. അവിടെവച്ച് പെട്ടന്ന് ഹൃദയസ്തംഭനം ഉണ്ടാവുകയായിരുന്നു.ഏക മകളുടെ മരണം ഉൾകൊള്ളാനാവാതെ വിതുമ്പുന്ന അമ്മ. 6 മാസമായി എങ്ങും പോകാതെ പ്രിയയോടൊപ്പം സ്‌നേഹ കൂട്ടാളിയായി നിന്ന ഭർത്താവിന്റെ വേദന. ഇന്നലെ രാത്രിയിൽ ആശുപത്രിയിൽ ചെല്ലുമ്പോൾ കാണുന്ന കാഴ്ച മനസ്സിൽ സങ്കട മഴയായി. എന്ത് പറഞ്ഞ് അവരെ അശ്വസിപ്പിക്കും…. വിശ്വാസികളായ ആ സാധു മനസുകളോട് എന്തിന് ദൈവം ഈ ക്രൂരത കാട്ടി….മനസ് ചോദ്യങ്ങൾ ആവർത്തിച്ചുകൊണ്ടേയിരുന്നു….ഉത്തരം കിട്ടാത്ത ചോദ്യങ്ങൾ… രഞ്ജുഷയുടെ മരണ വാർത്തയുടെ ഞെട്ടൽ മാറും മുമ്പ് അടുത്ത ഒന്നുകൂടി…. 35 വയസ് മാത്രമുള്ള ഒരാൾ ഈ ലോകത്തുനിന്ന് പോകുമ്പോൾ ആദരാജ്ഞലികൾ എന്ന് പറയാൻ മനസ് അനുവദിക്കുന്നില്ല…ഈ തകർച്ചയിൽ നിന്നും പ്രിയയുടെ ഭർത്താവിനെയും അമ്മയേയും എങ്ങനെ കരകയറ്റും… അറിയില്ല…. അവരുടെ മനസുകൾക്ക് അതിനുള്ള ശക്തിയുണ്ടാവട്ടെ….
