കണ്ണൂര്‍: ടൂറിസ്റ്റ് ബസിന്റെ ലഗേജ് കാരിയറിന്റെ തുറന്നുവച്ച വാതിലിടിച്ച് വയോധികന്‍ മരിച്ചു. കണ്ണൂർ തളിപ്പറമ്പ് ബക്കളം കടമ്പേരി റോഡിലെ കുന്നില്‍ രാജന്‍ (77) ആണ് മരിച്ചത്. അപകടത്തെ തുടർന്ന് നിര്‍ത്താതെ പോയ ബസ് പൊലീസ് പിന്തുടര്‍ന്ന് പിടികൂടി.(The open door of the luggage carrier of the tourist bus hit;77 year old man died)

കഴിഞ്ഞദിവസം രാവിലെ 6.45ന് ആണ് സംഭവം. പാൽ വാങ്ങാനായി ദേശീയപാതയുടെ സര്‍വീസ് റോഡരികിലുടെ നടന്നുപോകുമ്പോള്‍ കണ്ണൂര്‍ ഭാഗത്തുനിന്ന് വന്ന ടൂറിസ്റ്റ് ബസിന്റെ ലഗേജ് കാരിയറിന്റെ വാതില്‍ ഇടിക്കുകയായിരുന്നു. തൊട്ടു പിന്നാലെ എത്തിയ, തളിപ്പറമ്പ് പൊലീസ് സ്റ്റേഷനിലെ എഎസ്‌ഐ ഷിജോയോട് നാട്ടുകാര്‍ വിവരം പറഞ്ഞതിനെ തുടര്‍ന്ന് 2 കിലോമീറ്ററോളം പിന്തുടര്‍ന്ന് ഏഴാംമൈലില്‍ വച്ചാണ് ബസ് പിടികൂടിയത്.

വീതികുറഞ്ഞ സര്‍വീസ് റോഡിലൂടെ തുറന്നുവച്ച വാതിലുമായി ബസ് വേഗത്തില്‍ ഓടിച്ചു പോകുന്നതിന്റെ വിഡിയോ ദൃശ്യങ്ങള്‍ പുറത്തു വന്നിട്ടുണ്ട്. രാജനെ നാട്ടുകാര്‍ ഉടന്‍ തളിപ്പറമ്പിലെ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു.