ഝാൻസി: ഉത്തർപ്രദേശിൽ എൻഐഎ ഉദ്യോഗസ്ഥർ കസ്റ്റഡിയിലെടുത്ത ഇസ്ലാമിക മതപണ്ഡിതനെ ഉദ്യോഗസ്ഥരെ ഒരു സംഘം ആളുകൾ ആക്രമിച്ച ശേഷം മോചിപ്പിച്ചു. ഝാൻസിയിലാണ് സംഭവം.
ഇസ്ലാമിക മതപണ്ഡിതനായ മുഫ്തി ഖാലിദിനെയാണ് ആൾക്കൂട്ടം എൻഐഎ കസ്റ്റഡിയിൽ നിന്നും ബലംപ്രയോഗിച്ച് മോചിപ്പിച്ചത്.
സംഭവവുമായി ബന്ധപ്പെട്ട് കണ്ടാൽ അറിയാവുന്ന 111 പേർക്കെതിരെ കേസെടുത്തിട്ടുണ്ട്. വിദേശഫണ്ടിംഗുമായി ബന്ധപ്പെട്ടായിരുന്നു മുഫ്തി ഖാലിദെന്ന മത പണ്ഡിതനെ ദേശീയ അന്വേഷണ ഏജൻസിയുടെ ഉദ്യോഗസ്ഥർ കസ്റ്റഡിയിലെടുത്തത്.
വിദേശ ഫണ്ടിംഗ് കേസിൽ വ്യാഴാഴ്ചയായിരുന്നു മുഫ്തി ഖാലിദിന്റെ വീട്ടിൽ എൻഐഎ സംഘം റെയ്ഡ് നടത്തിയത്. പിന്നീട് ചോദ്യം ചെയ്യുന്നതിനായി കസ്റ്റഡിയിലെടുത്തു.
മുഫ്തി ഖാലിദിനെ എൻ.ഐ.എ ഉദ്യോഗസ്ഥർ കസ്റ്റഡിയിലെടുത്തതിന് തൊട്ടുപിന്നാലെ ഇരച്ചെത്തിയ ജനക്കൂട്ടം ഉദ്യോഗസ്ഥരെ ആക്രമിച്ച ശേഷം പ്രതിയെ മോചിപ്പിച്ച് കൊണ്ടുപോയിരുന്നു.
ജാൻസിപ്രദേശത്ത് നിന്നുള്ള ജനക്കൂട്ടമെത്തി ഉദ്യോഗസ്ഥരെ ആക്രമിച്ച് ഖാലിദിനെ മോചിപ്പിച്ച് കൊണ്ടുപോവുകയാണ് ചെയ്തതെന്ന് ഝാൻസി അഡീഷണൽ പൊലീസ് സൂപ്രണ്ട് ജ്ഞാനേന്ദ്ര സിംഗ് പ്രതികരിച്ചു.
ആയുധങ്ങളുപയോഗിച്ച് ആക്രമിക്കുക, ജോലി തടസ്സപ്പെടുത്തുക, കസ്റ്റഡിയിലെടുത്ത പ്രതിയെ മോചിപ്പിക്കുക തുടങ്ങിയ കുറ്റങ്ങൾ ചുമത്തി കണ്ടാലറിയുന്ന 11 പേർക്കെതിരെയും അജ്ഞാതരായ 100 പേർക്കെതിരെയും കേസെടുത്തതായി അദ്ദേഹം പറഞ്ഞു. പാകിസ്താൻ ഭീകരസംഘടനയായ ജെയ്ഷെ മുഹമ്മദുമായി ബന്ധപ്പെട്ട് പ്രവർത്തിക്കുന്നുണ്ടെന്ന കണ്ടെത്തലിന്റെ അടിസ്ഥാനത്തിലാണ് രാജ്യത്തെ 19 സ്ഥലങ്ങളിൽ എൻഐഎ പരിശോധന നടത്തിയത്.
അസം, മഹാരാഷ്ട്ര, ഉത്തർപ്രദേശ്, ബിഹാർ, പശ്ചിമ ബംഗാൾ, രാജസ്ഥാൻ, ഗുജറാത്ത്, ജമ്മു കശ്മീർ എന്നിവിടങ്ങളിലാണ് റെയ്ഡ് നടന്നത്. കേസുമായി ബന്ധപ്പെട്ട് നിർണായക തെളിവുകൾ അടങ്ങുന്ന മൊബൈൽ ഫോണുകൾ, പെൻഡ്രൈവുകൾ, സിഡികൾ, ഹാർഡ് ഡിസ്കുകൾ എന്നിവയുൾപ്പെടെ നിരവധി രേഖകളും ഇലക്ട്രോണിക് ഉപകരണങ്ങളും പിടിച്ചെടുത്തിട്ടുണ്ട്.
