അന്വേഷണത്തിന്‌ അനുവദിച്ച ഒരുമാസക്കാലാവധി ഇന്നവസാനിക്കും; എംആര്‍ അജിത്‌കുമാറിനെതിരേ പി.വി. അന്‍വര്‍ ഉന്നയിച്ച ആരോപണങ്ങളിന്മേലുള്ള അന്വേഷണ റിപ്പോര്‍ട്ട്‌ ഇന്ന് സമർപ്പിച്ചേക്കും

തിരുവനന്തപുരം: എ.ഡി.ജി.പി: എം.ആര്‍. അജിത്‌കുമാറിനെതിരേ പി.വി. അന്‍വര്‍ എം.എല്‍.എ. ഉന്നയിച്ച ആരോപണങ്ങളിന്മേലുള്ള അന്വേഷണ റിപ്പോര്‍ട്ട്‌ ഡി.ജി.പി. ഷെയ്‌ഖ് ദര്‍വേഷ്‌ സാഹിബ്‌ ഇന്നു വൈകിട്ട്‌ മുഖ്യമന്ത്രിക്കു സമര്‍പ്പിച്ചേക്കും.The inquiry report on the allegations leveled by PV Anwar against MR Ajithkumar is likely to be submitted today

അന്വേഷണത്തിന്‌ അനുവദിച്ച ഒരുമാസക്കാലാവധി ഇന്നവസാനിക്കും. ഇന്നലെ പോലീസ്‌ ആസ്‌ഥാനത്ത്‌ ചേര്‍ന്ന അന്വേഷണസംഘം റിപ്പോര്‍ട്ടിന്റെ അവസാനമിനുക്കുപണികള്‍ നടത്തി.
12 ആരോപണങ്ങളിലായിരുന്നു അന്വേഷണം.

ഇതില്‍, ആര്‍.എസ്‌.എസ്‌. നേതാക്കളുമായി എ.ഡി.ജി.പി. കൂടിക്കാഴ്‌ച നടത്തിയതിലടക്കം വീഴ്‌ചയുണ്ടായെന്നാണ്‌ ഡി.ജി.പിയുടെ നിഗമനം. അന്വേഷണ റിപ്പോര്‍ട്ടിന്റെ അടിസ്‌ഥാനത്തില്‍ എ.ഡി.ജി.പിക്കെതിരേ അച്ചടക്കനടപടിയും ക്രൈംബ്രാഞ്ച്‌ അന്വേഷണവും പോലീസ്‌ മേധാവി ശിപാര്‍ശ ചെയ്‌തേക്കും.

അനധികൃതസ്വത്ത്‌ സംബന്ധിച്ച ആരോപണങ്ങളില്‍ എ.ഡി.ജി.പിക്കെതിരേ വിജിലന്‍സ്‌ അന്വേഷണത്തിനു ഡി.ജി.പി. നേരത്തേ ശിപാര്‍ശ ചെയ്‌തിരുന്നു. അജിത്‌കുമാറിനെ ക്രമസമാധാനച്ചുമതലയില്‍നിന്നു മാറ്റിയേ തീരൂവെന്ന കടുത്ത നിലപാടിലാണു സി.പി.ഐ. നേതൃത്വം.

നിയമസഭാസമ്മേളനം നാളെ ആരംഭിക്കാനിരിക്കേ ഇക്കാര്യത്തില്‍ ഇനിയും തീരുമാനം വൈകിയാല്‍ പ്രതിപക്ഷത്തിനു പുറമേ സി.പി.ഐ. കൈക്കൊള്ളുന്ന നിലപാടും സര്‍ക്കാരിനു തലവേദനയാകും.
സി.പി.ഐ. സംസ്‌ഥാന സെക്രട്ടറി ബിനോയ്‌ വിശ്വം ഇന്നലെയും എ.കെ.ജി. സെന്ററിലെത്തി മുഖ്യമന്ത്രി പിണറായി വിജയനെ നിലപാടറിയിച്ചു.

ഇന്ന്‌ സി.പി.എം. സംസ്‌ഥാന സെക്രട്ടേറിയറ്റും പിന്നാലെ സംസ്‌ഥാനസമിതിയും ചേരും. പ്രതിപക്ഷം ഉയര്‍ത്തുന്ന ആരോപണങ്ങള്‍ നിയമസഭയില്‍ ചെറുക്കാന്‍ എ.ഡി.ജി.പിക്കെതിരേ നടപടി വേണമെന്ന്‌ സി.പി.എം. നേതൃത്വവും കരുതുന്നു. എന്നാല്‍, മുഖ്യമന്ത്രിയുടെ നിലപാടുതന്നെയാകും നിര്‍ണായകം.”