ന്യൂഡല്ഹി: വഖഫ് ഭേദഗതി ബില്ലിനെ ചോദ്യം ചെയ്ത് കോണ്ഗ്രസ് സുപ്രീംകോടതിയെ സമീപിക്കും. ഭരണഘടനാ വിരുദ്ധമായ ബില്ലിനെ നിയമപരമായി നേരിടുമെന്നാണ് വിവരം.
ഉടന് തന്നെ വഖഫ് നിയമഭേദഗതിക്കെതിരെ സുപ്രീംകോടതിയില് ഹര്ജി സമര്പ്പിക്കുമെന്ന് എഐസിസി ജനറല് സെക്രട്ടറി ജയ്റാം രമേശ് എക്സില് കുറിച്ചു.
വഖഫ് ബില്ലിനെ ചോദ്യം ചെയ്ത് കോടതിയെ സമീപിക്കുമെന്ന് ഡിഎംകെയും പ്രഖ്യാപിച്ചിട്ടുണ്ട്.
കോണ്ഗ്രസ് മുന്കാലത്ത് മോദി സര്ക്കാര് കൊണ്ടുവന്ന നിയമങ്ങളെ ചോദ്യം ചെയ്ത് സുപ്രീംകോടതിയെ സമീപിച്ചതിന്റെ പട്ടികയും ജയ്റാം രമേശ് ഇതോടൊപ്പം എക്സില് പങ്കുവെച്ചിട്ടുണ്ട്.
2005 ലെ വിവരാവകാശ നിയമ ഭേദഗതി, തെരഞ്ഞെടുപ്പ് പരിഷ്കരണം (2024), 1991 ലെ ആരാധനാലയ നിയമത്തിലെ ഇടപെടല് തുടങ്ങിയവക്കെതിരെ കോണ്ഗ്രസ് നല്കിയ ഹര്ജികള് നിലവിൽ സുപ്രീംകോടതിയുടെ പരിഗണനയിലാണ്.
ഭരണഘടനയുടെ അന്തസത്തക്കെതിരായ മോദി സര്ക്കാരിന്റെ എല്ലാ കടന്നാക്രമണങ്ങളെയും കോണ്ഗ്രസ് ആത്മവിശ്വാസത്തോടെ ചെറുക്കുമെന്നും ജയ്റാം രമേശ് എക്സില് കുറിച്ചു.
