തിരുവനന്തപുരം: മാറ്റിവെച്ച ചാമ്പ്യൻസ് ബോട്ട് ലീഗ് (സിബിഎൽ) നടത്താൻ സർക്കാർ തീരുമാനം. വയനാട് ഉരുൾപൊട്ടൽ ദുരന്തത്തിൻ്റെ പശ്ചാത്തലത്തിൽ മാറ്റിവെച്ച സിബിഎൽ നടത്താനുള്ള സംസ്ഥാന സർക്കാർ വിജ്ഞാപനം ഇറങ്ങി. ഇക്കുറി അഞ്ച് വേദികൾ ഒഴിവാക്കിയാണ് സിബിഎൽ നടത്തുന്നത്. നവംബർ 16ന് കോട്ടയം താഴത്തങ്ങാടിയിൽ നടക്കുന്ന മത്സരത്തോടെ സിബിഎല്ലിന് തുടക്കമാകും. Champions Boat League
താഴത്തങ്ങാടിക്ക് പുറമെ കൈനകരി, പാണ്ടനാട്, കരുവാറ്റ, കായംകുളം, കൊല്ലം എന്നിവിടങ്ങളിലും മത്സരം നടക്കും. ഡിസംബർ 21ന് കൊല്ലം പ്രസിഡൻറ് ട്രോഫിയോടെയായിരിക്കും സിബിഎൽ സമാപിക്കുക.
വയനാട് ദുരന്തത്തിൻറെ പശ്ചാത്തലത്തിലാണ് സിബിഎൽ മാറ്റിവെച്ചത്. സിബിഎൽ നടത്തണമെന്ന് ബോട്ട് ക്ലബ്ബുകൾ ആവശ്യപ്പെട്ടിരുന്നു. വയനാട് ദുരന്തത്തിൻറെ പശ്ചാത്തലത്തിൽ മാറ്റിവെച്ച നെഹ്റു ട്രോഫി മത്സരം നടത്തിയിരുന്നെങ്കിലും സിബിഎല്ലിൻറെ കാര്യത്തിൽ അനിശ്ചിതത്വം തുടർന്നിരുന്നു. ബോട്ട് ക്ലബ്ബുകളുടെ അസോസിയേഷനുകളുടെ ആവശ്യം പരിഗണിച്ചുകൊണ്ടാണിപ്പോൾ സർക്കാർ ഇതുസംബന്ധിച്ച വിജ്ഞാപനം ഇറക്കിയത് .
