പരിശോധനയ്ക്കായി കാറിൽ കയറിയ എക്സൈസ് ഉദ്യോഗസ്ഥനെ തട്ടിക്കൊണ്ടു പോകാൻ ശ്രമം. കൂട്ടുപുഴ എക്സൈസ് ചെക്പോസ്റ്റിൽ വ്യാഴാഴ്ച പുലർച്ചെ 2.25ന് ആണ് സംഭവം. ചെക്പോസ്റ്റിൽ പരിശോധനയ്ക്കായി കാറിൽ കയറിയ എക്സൈസ് പ്രിവന്റീവ് ഓഫിസറെയാണ് നാടകീയമായി തട്ടിക്കൊണ്ടുപോകാൻ ശ്രമിച്ചത്. പിന്നീട് കിലോമീറ്ററുകൾ അകലെ കാർ വേഗം കുറച്ചപ്പോൾ ഉദ്യോഗസ്ഥൻ ചാടി രക്ഷപ്പെടുകയായിരുന്നു.
സംഭവം ഇങ്ങനെ:
ചെക്ക്‌പോസ്റ്റിൽ പരിശോധനയ്ക്കിടെ കർണാടക ഭാഗത്തുനിന്നു വന്ന കാർ ഉദ്യോഗസ്ഥഫർ കൈകാണിച്ചു നിർത്തി. കാറിനുള്ളിൽ പരിശോധിക്കുന്നതിടെ കാറിന്റെ മുൻസീറ്റിൽ പരിശോധിക്കുകയായിരുന്ന അസി.എക്സൈസ് ഇൻസ്പെക്ടർ കെ.കെ.ഷാജിയെ പുറത്തേക്കു തള്ളിയിട്ടശേഷം, പിറകിലെ പരിശോധന നടത്തുകയായിരുന്ന പ്രിവന്റീവ് ഓഫിസർ ഷാജി അളോക്കനുമായി കാർ അതിവേഗം കടന്നു കളയുകയായിരുന്നു.
സംഭവം നടന്ന ഉടൻ തൊട്ടടുത്ത കൂട്ടുപുഴ പൊലീസ് എയ്ഡ് പോസ്റ്റിലും ഇരിട്ടി പൊലീസ് സ്റ്റേഷനിലും ഇരിട്ടി എക്സൈസ് സർക്കിളിന്റെ സ്ട്രൈക്കിങ് പാർട്ടിക്കും വിവരം കൈമാറി. അന്വേഷണം നടക്കുന്നതിനിടെ 3 കിലോമീറ്റർ ആകലെ കിളയന്തറയിവച്ചാണ് ഷാജി കാറിൽനിന്നും ചാടി രക്ഷപ്പെട്ടത്. പ്രതികൾക്കായി അന്വേഷണം ആരംഭിച്ചു.
