2019ലെ രണ്ടാം പ്രളയം മുതൽ വയനാട് ദുരന്തം വരെയുള്ള രക്ഷാപ്രവർത്തനത്തിനായുള്ള എയർലിഫ്റ്റ് സേവനത്തിന് ചെലവാക്കിയ തുക കേരളം അടിയന്തരമായി തിരിച്ചടക്കണമെന്ന് കേന്ദ്ര സർക്കാർ. 132,62,00,000 ലക്ഷം രൂപ ഉടൻ തിരിച്ചടക്കണമെന്നാവശ്യപ്പെട്ടാണ് കേരളത്തിന് കേന്ദ്രം കത്ത് നൽകിയത്. കേന്ദ്രം ചീഫ് സെക്രട്ടറിക്ക് അയച്ച കത്തിന്റെ പകർപ്പ് മാധ്യമങ്ങൾ പുറത്തുവിട്ടു. കേന്ദ്ര പ്രതിരോധ മന്ത്രാലയത്തിന്റെ ജോയ്ന്റ് സെക്രട്ടറി എയർ മാർഷൽ വിക്രം ഗൗർ ആണ് സംസ്ഥാനത്തിന് കത്തയച്ചത്.
വയനാട് ദുരന്തത്തിന് കേന്ദ്രം ഒരു രൂപ പോലും തന്നില്ല എന്ന മുഖ്യമന്ത്രിയുടെ പ്രസ്താവന വന്നു ദിവസങ്ങൾക്കുള്ളിൽ ആണ് കേന്ദ്രത്തിന്റെ പുതിയ നിർദേശം വന്നിരിക്കുന്നത്. വയനാട് ഉരുൾപൊട്ടൽ, പ്രളയ രക്ഷാപ്രവർത്തനം എന്നിവയുമായി ബന്ധപ്പെട്ടാണ് വ്യോമ സേനയുടെ സഹായം സംസ്ഥാന സർക്കാർ അഭ്യർഥിച്ചത്. സാധാരണ ഇത്തരത്തിലുള്ള തുക കുടിശികയായി വരുമ്പോൾ എസ്ഡിആർഎഫ് ഫണ്ടിൽ നിന്ന് ആ തുക കുറയ്ക്കാറാണ്പതിവ്.
വയനാട് ദുരന്തത്തിന്റെ ആദ്യദിനമായ ഓഗസ്റ്റ് 30ന് മാത്രം ചെലവ് 8,91,23,500 രൂപയാണ്. വിവിധ ദിവസങ്ങളിലായി വയനാട്ടിൽ നടത്തിയ രക്ഷാ പ്രവർത്തനത്തിന് ആകെ നൽകേണ്ടത് 69,65,46,417 രൂപയാണ്. വയനാട് ധനസഹായത്തെ ചൊല്ലി കേന്ദ്ര സംസ്ഥാന സർക്കാരുകൾ തമ്മിൽ വലിയ തർക്കം നടക്കുമ്പോഴാണ് ഇത്തരത്തിൽ കത്ത് പുറത്തുവന്നത്.
പുനരധിവാസത്തിന് കാര്യമായ സഹായം കിട്ടിയില്ലെന്ന കേരളത്തിന്റെ വലിയ പരാതി നിലനിൽക്കെയാണ് എസ്ഡിആർഎഫിലെ നീക്കിയിരിപ്പിൽ നിന്ന് വലിയൊരു തുക കേന്ദ്രം ഇപ്പോൾ തിരിച്ച് ചോദിക്കുന്നത്. 2018 ലെ പ്രളയത്തിലും സമാനമായ രീതിയിൽ എയർലിഫ്റ്റ് സേവനത്തിന് കേന്ദ്രം പണം ആവശ്യപ്പെട്ടിരുന്നു.
